तुमची प्रतिमा डॉनसारखी का आहे? अमृता फडणवीसांच्या थेट प्रश्नाला राज ठाकरेंचंही तितकंच स्पष्ट उत्तर, म्हणाले…

अमृता फडणवीस राज ठाकरेंना प्रश्न विचारत म्हणाल्या, “प्रभावी विरोधकाला लोक घाबरतात. मात्र, प्रशासक लोकांना घाबरायला लागतो. राज ठाकरेंची आजही एकदम डॉनसारखी प्रतिमा आहे. म्हणजे चांगल्या डॉनची प्रतिमा आहे. उद्योग क्षेत्र, चित्रपटसृष्टी असो किंवा राजकारणी असो, आजही राज ठाकरेंना घाबरतात. ही प्रतिमा तुम्ही जाणूनबुजून तयार केली की तुमचं व्यक्तिमत्त्व, आंदोलनं, तुमच्यावरील दाखल गुन्हे यामुळे घाबरतात?”

“डॉन नाही, पण तसा मी ‘नो नॉनसेन्स’वाला माणूस”

या प्रश्नावर राज ठाकरे म्हणाले, “प्रतिमा ही काही तयार केलेली गोष्ट नसते. तयार केलेली गोष्ट ही तात्पुरती असते. मुळात मी तसा असेन. डॉन नाही, पण तसा मी ‘नो नॉनसेन्स’वाला माणूस आहे. मी परखडपणे बोलत असेल, स्पष्टपणे बोलत असेन, पण उद्धटपणे बोलत नाही. मात्र, अनेकदा लोकांना स्पष्टपणा आणि उद्धटपणातील फरक कळत नाही. असं असलं तरी मी स्पष्टपणे बोलतो.”

“मला राग फार पटकन येतो, पण तो राग”

“मला राग फार पटकन येतो, पण तो राग तितक्याच पटकन मावळतोही. मला कित्येकदा आमच्या पक्षातील लोक म्हणतात की, जरा कमी स्पष्ट बोला,” असं राज ठाकरेंनी नमूद केलं.

हेही वाचा : अमृता फडणवीसांच्या ‘त्या’ वक्तव्यावर अजित पवारांची प्रतिक्रिया, म्हणाले, “मला जर कुणी…”

अमृता फडणीसांचे प्रश्न, राज ठाकरेंची उत्तरं

यावर अमृता फडणवीसांनी तुम्ही स्पष्ट बोलता असं म्हणाले, मग मी काही लोकांची नावं घेईन त्यांना तुम्ही काय सल्ला द्याल?

अमृता फडणवीस – एकनाथ शिंदे
राज ठाकरे – जपून राहा

अमृता फडणवीस – देवेंद्र फडणवीस
राज ठाकरे – वरती संबंध नीट ठेवा

अमृता फडणवीस – अजित पवार<br>राज ठाकरे – मला ५ तारखेच्या माझ्या रत्नागिरीतील सभेत सविस्तर बोलायचं आहे. एका वाक्यात बोलायचं नाही, पण अजित पवार बाहेर जेवढं लक्ष देत आहेत तेवढंच त्यांनी काकांकडेही लक्ष द्यावं.

अमृता फडणवीस – उद्धव ठाकरे<br>राज ठाकरे – उद्धव ठाकरेंना काय सांगणार मी, ते स्वयंभू आहेत.

अमृता फडणवीस – आदित्य ठाकरे<br>राज ठाकरे – तेच ते.

यानंतर अमृता फडणवीस राज ठाकरेंना म्हणाल्या, “तुम्ही म्हणालात की देवेंद्र फडणवीसांनी जरा वर लक्ष दिलं पाहिजे, तसं त्यांनी घरीही लक्ष दिलं पाहिजे. माझा तुम्हाला एक प्रश्न आहे.” यावर राज ठाकरे म्हणाले, “मला तुमच्या घरच्या प्रश्नांमध्ये आणू नका. मला जेव्हा तुम्ही मुलाखत घेणार हे समजलं…”

हेही वाचा : अमृता फडणवीसांचा अजित पवारांना टोला, म्हणाल्या, “ते लोक खूप ठिकाणी डोळे मारतात, त्यामुळे…”

याचवेळी अमृता फडणवीस पुढे म्हणाल्या, “आपल्या घरातील जी परिस्थिती आहे ती प्रत्येक राजकारण्याच्या घरी असते. तुम्हाला तुमच्या व्यक्तिगत आयुष्यात फिरण्यासाठी, नातेसंबंध दृढ करण्यासाठी, सोबत देण्यासाठी वेळ असतो का? देवेंद्र फडणवीस म्हणतात की, व्यग्र राजकारणी असेच असतात, म्हणून मी तुम्हाला विचारून हे तपासत आहे.”