माऊंट मेरी यात्रेनिमित्त बेस्टच्या ३७४ जादा बस

माऊंट मेरी चर्च, फादर अॅग्नल आश्रम या परिसरात यात्रेसाठी येणाऱ्यांची संख्या अधिक असते. यात्रेकरू मोठ्या प्रमाणावर वांद्रे स्थानक (प) येथे लोकलने जाऊन तेथून उपक्रमाच्या बसचा लाभ घेतात. बसचे प्रवर्तन माऊंट मेरी चर्चपर्यंत करणे शक्य नसते. त्यामुळे वांद्रे रेल्वे स्थानक (प) आणि हिल रोड उद्यान या दरम्यान जादा बस कार्यान्वित करण्यात येतील. याव्यतिरिक्त वांद्रे परिसरातील नियमित बसमार्गावरही अतिरिक्त बसगाडया सोडण्यात येतील.

यात्रेनिमित्त वांद्रे स्थानक (प) आणि माऊंट मेरी चर्च परिसरात होणारी प्रवाशांची गर्दी विचारात घेऊन प्रवाशांना योग्य मार्गदर्शन व सहकार्य करण्यासाठी बस निरीक्षक आणि वाहतूक अधिकाऱ्यांची नियुक्ती संपूर्ण कालावधीसाठी केली आहे. प्रवाशांनी या बससेवेचा लाभ घ्यावा, असे आवाहन बेस्ट प्रशासनातर्फे केले आहे.