आशिष शेलारांचा उद्धव ठाकरेंना टोला, “मी तर तुमच्या पराभवाचे ढोल, तुतारी आणि सोनेरी पेढे यांची…”

काय म्हटलं आहे आशिष शेलार यांनी

उध्दवजी…

मुंबई महापालिकेची निवडणूक झालीच पाहिजे, लवकर झाली पाहिजे… या आपल्या मागणीला आमचा पूर्ण पाठिंबा आहे.

म्हणूनच तुम्ही वॉर्ड रचनेबाबत आपले बगलबच्चे राजू पेडणेकर आणि समीर देसाई यांनी केलेल्या याचिका मागे घ्या…

तुम्ही जे घालवलेत त्या ओबीसीच्या आरक्षणाची याचिका ही सर्वोच्च न्यायालयात प्रलंबित आहे..त्याचा निकाल न लागता, ओबीसीना आरक्षण न देता तुम्हाला निवडणुका हव्यात का?

आमच्या ओबीसींच्या पाठीत असा खंजीर खुपसणार का ? असा छुपा अजेंडा घेऊन का येताय? ” मर्दा” सारखे मैदानात या..

भाजपाचे कार्यकर्ते तुम्हाला हरवण्यासाठी पूर्ण ताकदीने सज्ज आहेत.

मी तर तुमच्या पराभवाचे ढोल, तुतारी आणि सोनेरी पेढ्यांची ऑर्डर देऊनच ठेवलेय.

तुमचे बोलघेवडे आणि आमचे ध्येयवेडे अशी लढत होऊनच जाऊ द्या..

लक्षात ठेवा विजय नेहमी ध्येयवेड्यांचाच होतो!

छत्रपतींचा आशीर्वाद मुंबईकरांची भाजपालाच साथ!

उद्धव ठाकरे काय म्हणाले होते?

“राजस्थान, छत्तीगसड आणि मध्य प्रदेशच्या निवडणुकीत भाजपाला भरघोस यश मिळालं आहे. आता, मुंबई महापालिकेची निवडणूक घेऊन दाखवा. एवढी तुमची लाट असेल, तर लोकसभेची एक निवडणूक बॅलेट पेपरवर घ्या. आमच्याही मनात काही शंका नको. सगळं वातावारण विरोधात आहे. एक्झिट पोल आणि उलटेपालटे करणारे निकाल लागत आहेत. मग, हे कसं घडलं? हा प्रश्न मतदारांना पडत असेल. ती शंका दूर करण्यासाठी एकच निवडणूक दम असेल, तर बॅलेट पेपरवर घ्या.”