मालमत्ता कर वसुली घसरल्याने उपायुक्तांची तडकाफडकी बदली

मुंबई : मुंबई महापालिकेच्या महसुलाचा मुख्य स्रोत बनलेल्या मालमत्ता कराची वसुली घसरल्यामुळे करनिर्धारण व संकलन विभागाची जबाबदारी असलेल्या उपायुक्तांची बुधवारी तडकाफडकी बदली करण्यात आली.

वस्तू आणि सेवा कर लागू झाल्यानंतर पालिकेला मोठे उत्पन्न मिळवून देणारा जकात कर बंद झाला. त्यामुळे पालिकेने मोठे उत्पन्न मिळवून देणाऱ्या मालमत्ता कराच्या वसुलीवर लक्ष केंद्रित केले होते. पालिकेच्या २०१९-२० या वर्षांच्या अर्थसंकल्पात मालमत्ता कराद्वारे ५०१६.१९ कोटी रुपये महसूल मिळण्याचे उद्दिष्ट निश्चित करण्यात आले होते. मात्र जानेवारी २०२० पर्यंत २९१६ कोटी रुपये मालमत्ता कर करनिर्धारण आणि संकलन विभागाने वसूल केला. त्यामुळे पालिकेच्या महसुलावर परिणाम झाला आहे. ही बाब लक्षात घेत करनिर्धारण व संकलन विभागाची सूत्रे हाती असलेले उपायुक्त विजय बालमवार यांची बुधवारी तडकाफडकी बदली करण्यात आली.

विजय बालमवार यांची उपायुक्त (परिमंडळ- ६) येथे बदली करण्यात आली आहे. तर उपायुक्त (परिमंडळ- ६) देवेंद्रकुमार जैन यांची उपायुक्त (अतिक्रमण निर्मूलन) पदावर बदली करण्यात आली आहे. उपायुक्त (सुधार) रमेश पवार यांच्याकडे उपायुक्त (करनिर्धारण व संकलन) पदाचा अतिरिक्त कार्यभार देण्यात आला आहे. बालमवार यांची तडकाफडकी बदली करण्यात आल्यामुळे पालिकेमध्ये उलटसुलट चर्चाना ऊत आला आहे.