भाडेतत्त्वावरील बसमुळे तूट, महापालिकेने बेस्ट उपक्रमाला दिलेला कृती आराखडा अपयशी

बेस्टच्या साधारण बसचे किमान भाडे ५ रुपये, तर वातानुकूलित बसचे किमान भाडे ६ रुपये करण्यात आले होते. बेस्टच्या भाड्यात कपात झाल्यामुळे प्रवासी वाढले, पण बेस्टचा महसूल घसरला होता. त्यामुळे बेस्टचा तोटा आणखी वाढला. भाडेतत्त्वावरील बसगाड्या टप्प्याटप्प्याने बसताफ्यात समाविष्ट होत आहेत. परंतु, भाडेतत्त्वावरील बसगाड्या चालवण्याचा खर्चही दिवसेंदिवस वाढत आहे. त्यातच कार्यादेश देऊनही भाडेतत्त्वावरील गाड्या वेळेवर उपलब्ध होऊ शकल्या नाहीत. टप्प्याटप्प्याने बसगाड्या येत असल्यामुळे बसचा ताफा पुरेसा नाही. या सगळ्याचा परिणाम प्रवासी सेवेवर होत असून प्रवासी घटू लागले आहेत. भाडेतत्त्वावरील गाड्या वेळेवर उपलब्ध न झाल्यामुळे हा प्रयोग फसल्याची चर्चा आहे.

पथकराचा भार

मुंबईच्या बाहेरही बेस्टच्या बसगाड्या जात असतात. पश्चिम उपनगरात भाईंदरपर्यंत तर पूर्व उपनगरात वाशीपर्यंत बसगाड्या जातात. मुंबई बाहेरील पथकर नाक्यांवर बेस्टच्या गाड्यांवर प्रतिफेरी १५० रुपये इतका पथकर भरावा लागतो. त्यामुळे वार्षिक ८ कोटी इतका भार बेस्टवर येतो.

मुंबई महापालिका प्रशासनाने कृती आराखडा दिला तेव्हा काही जबाबदारी घेतली होती. ती पार पाडली नाही. त्यामुळे ही तूट वाढत गेली. त्यामुळे बेस्टच्या या तुटीला मुंबई महापालिकाच जबाबदार आहे. भाडेतत्त्वावर बसगाड्या आल्या तर खर्च कमी होईल असा दावा केला जात होता. पण आता खर्च वाढला म्हणून बसभाडेवाढ करण्याचा आग्रह बेस्ट प्रशासन करीत आहे. म्हणजे हा प्रयोग फसला आहे. त्याची कोणीतरी जबाबदारी घ्यायला हवी. सुनील गणाचार्य, बेस्ट समितीचे माजी सदस्य