पॉईंटमनने वाचवले मुलाचे प्राण; वांगणी रेल्वे स्थानकातील थरार सीसीटीव्हीत कैद

वांगणी स्थानकाच्या प्लॅटफॉर्म क्रमांक दोनवर एक अंध महिला मुलासह चालत होती. यावेळी मुलगा प्लॅटफॉर्मच्या कडेला असताना तोल जाऊन रुळावर पडला. ट्रेन अवघ्या सेकंदावर दिसत होती. त्यामुळे अंध महिला कासावीस होऊन आरडाओरड करत होती. ही बाब पाईंटमन मयूर शेळके यांना दिसली. त्याने क्षणाचाही विलंब न करता रुळावर धाव घेतली. एखाद्या चित्रपटातील दृष्य असल्यासारखी प्रत्यक्ष घटना अनेकांच्या काळजाचा ठोक चुकवून गेली. देव तारी त्याला कोण मारी या म्हणीचा प्रत्यय आला. वांगणी स्थानकावर शनिवारी (१७ एप्रिल) ही घटना घडली. देवदूतासारख्या मयूर शेळकेने त्या चिमुकल्याचे प्राण वाचवले. एका सेकंदाचाही विलंब झाला असता तर मयूरलाही जीव गमवावा लागला असता हेही तितकंच खरं. मात्र जीवाची बाजी लावून त्याने चिमुकल्याला जीवदान दिलं.

पाईंटमनन मयूर शेळके याच्या प्रसंगावधानाचं सर्वत्र कौतुक होत आहे. त्याच्या कामगिरीसाठी अनेक जण शाबासकी देत आहेत. त्याच्या कामगिरीचा व्हिडिओ सोशल मीडियावर चांगलाच व्हायरल होत आहे. नेटकरी तोंडात बोटं टाकून खरा देवदूत असल्याच्या कमेंट्स देत आहेत.