सायरस मिस्त्री यांनी समूहाचा विश्वासघात केला; टाटा सन्सचा आरोप

टाटा सन्सकडून एक निवदेन जाहीर करून सायरस मिस्त्री यांच्यावर समूहाचा विश्वासघात केल्याचा आरोप करण्यात आला. सायरस मिस्त्री यांची गुरूवारी टाटा कन्सल्टन्सी सर्व्हिसेसच्या (टीसीएस) संचालक मंडळ अध्यक्षपदावरून उचलबांगडी करण्यात आली होती. त्यानंतर टाटा सन्सकडून हे निवदेन प्रसिद्ध करण्यात आले आहे. यामध्ये टाटा सन्सने सायरस मिस्त्री यांनी आपला विश्वासघात केल्याचे म्हटले आहे. तसेच सायरस मिस्त्री समुहातील मुख्य कंपन्यांचा ताबा घेण्याचा प्रयत्न करत होते, असा आरोपही टाटा सन्सने केला आहे. समुहाचा एकमेव चेहरा बनता यावे, यासाठी मिस्त्री यांनी योजनापूर्वक रणनीती आखली होती. मिस्त्री यांच्या नेतृत्त्वकाळात टाटा समुहाची १०० वर्षे जुनी शिस्त मोडण्याचा प्रयत्न झाला. त्यामुळे समूह प्रवर्तक आणि समभागधारकांपासून दूर चालला होता, असे टाटा सन्सने आपल्या निवेदनात म्हटले आहे.
तत्पूर्वी आज सकाळीच सायरस मिस्त्री यांची आता समूहातील टाटा कन्सल्टन्सी सर्व्हिसेसच्या (टीसीएस) संचालक मंडळ अध्यक्षपदावरूनही उचलबांगडी करण्यात आली. त्यांच्या जागी अंतरिम अध्यक्ष म्हणून इशात हुसेन यांची नियुक्ती करण्यात आली आहे. टीसीएसकडून याबाबत मुंबई शेअर बाजाराला कळविण्यात आले आहे. या निर्णयामुळे सायरस मिस्त्री यांना आणखी एक मोठा झटका बसला होता.