आतले आणि बाहेरचे हा वादच न पटणारा; अभिनेता शाहरूख खान याचे मत

लोक तुमच्याविषयी काय बोलतात, यापेक्षा तुम्हाला तुमच्या क्षेत्रात स्वत:चे अस्तित्व सिद्ध करण्याची किती ईर्ष्या आहे हे महत्त्वाचे ठरते. इथे कोणीही तुमची काळजी करायला बसलेले नाही. पुढे जाण्यासाठी तुम्ही किती आसूसलेले आहात, तुमचा निश्चय, तुमचे प्रयत्नच तुम्हाला एखाद्या क्षेत्रात पुढे जाण्यासाठी मदत करतात, असे शाहरुखने या वेळी सांगितले.

या वेळी स्वत:चा अनुभव सांगताना, मी जेव्हा या चित्रपटक्षेत्रात आलो तेव्हा हेच माझे विश्व आहे, अशी माझी ठाम धारणा होती. त्यामुळे चित्रपटसृष्टीतील लोकांनीही खुल्या दिलाने माझे स्वागत केले, असे सांगत तुम्ही स्व-प्रयत्नानेच आणि स्वबळावरच ओळख निर्माण करू शकता, ही बाब त्याने अधोरेखित केली.

हार न मानता संघर्ष करत राहायला हवा : दीपिका पदुकोण

आजवरच्या वाटचालीकडे पाहात असताना एका १८ वर्षांच्या तरुणीसाठी मुंबईसारख्या मोठ्या शहरात येऊन अभिनय क्षेत्रात स्वत:ची ओळख निर्माण करणे ही फार मोठी गोष्ट होती. सातत्याने काम करत चुकता चुकता सगळे शिकत गेले, अशी आठवण अभिनेत्री दीपिका पदुकोण हिने सांगितली. या क्षेत्रात वावरताना अपयश आले तरी हार न मानता संघर्ष करत राहायला हवा. स्वत:ची वेगळी प्रतिमा तयार करायला हवी, असे सांगतानाच कितीही यशस्वी झाले तरी माझे कुटुंबीय कायम मला जमिनीवर ठेवतात, असेही तिने सांगितले. सध्या आई म्हणून जबाबदारी मोठी असल्याने बराचसा वेळ मुलगी दुआच्या मागे जातो, असेही तिने सांगितले.

चित्रपट व्यवसायाच्या दृष्टीने विचार करताना अधिकाधिक चित्रपटगृहांची त्यातही छोट्या शहरांमधून आणि गावांमधून स्वस्तात चित्रपट पाहण्याची संधी देणाऱ्या छोटेखानी चित्रपटगृहांची आज अधिक गरज आहे, तरच चित्रपट देशभरातील कानाकोपऱ्यातील प्रेक्षकांपर्यंत पोहोचू शकतील.

–शाहरुख खान, अभिनेता