मुलुंडमध्ये मराठी महिलेला कार्यालयासाठी जागा नाकरणाऱ्या पिता – पुत्राला अटक

हेही वाचा >>> “घर नाकारणाऱ्या सचिवाला…”; शर्मिला ठाकरेंची भेट घेतल्यानंतर तृप्ती देवरूखकरांची पहिली प्रतिक्रिया

मुलुंड पश्चिम येथील शिवसदन इमारतीमध्ये बुधवारी सकाळी ही घटना घडली. पीडित महिला तृप्ती देवरूखकर पतीसोबत या सोसायटीमध्ये कार्यालयाकरीता जागा शोधण्यासाठी गेल्या होत्या. यावेळी सोसायटीचे सचिव प्रवीण ठक्कर आणि त्यांचा मुलगा निलेश ठक्कर यांनी आम्ही मराठी माणसांना जागा देत नाही असे सांगितले. यावेळी महिलेने या संपूर्ण घटनेचे मोबाइलमध्ये चित्रण केले. मात्र या पिता-पुत्राने महिलेसोबत झटापट करून त्यांचा मोबाइल काढून घेण्याचा प्रयत्न केला. या संपूर्ण घटनेचे चित्रीकरण महिलेने समाजमाध्यमांव टाकल्यानंतर तत्काळ त्याची दखल मनसेच्या कार्यकर्त्यानी घेतली. त्यांनी संबंधित वृद्ध व्यक्तीला गाठून याबाबत जाब विचारला. अखेर या दोघांनी महिलेची माफी मागितली. दरम्यान, तृप्ती देवरूखकर यांनी गुरुवारी रात्री याप्रकरणी मुलुंड पोलीस ठाण्यात तक्रार दाखल केली. पोलिसांनी याप्रकरणी गुन्हा दाखल करून रात्रीच पिता-पुत्राला ताब्यात घेऊन अटक केली. त्यानंतर या दोघांची जामिनावर मुक्तता करण्यात आली.