क्लिनरमुळे बसणारा दंड रद्द; मालवाहतूकदार संघटनांना दिलासा

राज्यातील ट्रक चालक आणि व्यावसायिक वाहन चालक विनाक्लीनर प्रवास करत असल्यास रोज १,५०० रुपये दंड आकारण्यात येत होता. तसेच हे चालन वारंवार भरावे लागत होते. ही कारवाई अन्यायकारक आणि आर्थिकदृष्ट्या त्रासदायक होती. त्यामुळे हजारो ट्रान्सपोर्टर्सना आर्थिक फटका बसत होता व मानसिक त्रास सहन करावा लागत होता. याबाबत अनेकदा अवजड मालवाहतूकदारांनी क्लिनर सक्ती रद्द करण्याची मागणी केली जात होती.

परंतु, त्याला यश येत नव्हते. त्यामुळे राज्यातील अवजड आणि प्रवासी वाहतूकदारांच्या कृती समितीने विविध मागण्यांसाठी १६ जून २०२५ रोजी आझाद मैदानात आंदोलन सुरू केले. तर, १ जुलै २०२५ रोजीपासून अनिश्चित काळापर्यंत संप पुकारला होता. त्यानंतर, परिवहन मंत्री प्रताप सरनाईक, परिवहन विभागाचे वरिष्ठ अधिकारी आणि राज्यातील सर्व प्रमुख वाहतूक संघटना यांची बैठक पार पडली. या बैठकीत मागण्या मान्य करण्याचे आश्वासन परिवहन विभागाने दिले होते.

विजयोत्सव साजरा करणार

क्लिनर रद्द करण्याचा निर्णय केवळ प्रशासकीय निर्णय नसून हा त्या प्रत्येक ट्रक चालक, ट्रान्सपोर्टर आणि या सेवेशी निगडीत असलेल्या प्रत्येकासाठी जिव्हाळ्याचा विषय आहे. क्लिनर रद्द करण्याची मागणी अनेक कालावधीपासून सुरू होती. या मागणीला यश आले असून विजयोत्सव साजरा केला जाणार आहे. या निर्णयामुळे कोट्यवधी रुपयांची बचत होईल. तसेच चालकांचा अनावश्यक त्रास आणि मानसिक तणावापासून मुक्ती मिळणार आहे. हा निर्णय परिवहन क्षेत्रासाठी सकारात्मक बदल घडवणारा टप्पा आहे.- बल मलकीत सिंह, माजी अध्यक्ष, ऑल इंडिया मोटर ट्रान्सपोर्ट काँग्रेस</strong>