Mumbai Fire News: आज लक्ष्मीपूजनाच्या दिवशी मुंबईतील तीन ठिकाणी आग लागण्याच्या घटना घडल्या आहेत. तीनही घटनांमध्ये अद्याप जखमी किंवा कुणाला हानी झाल्याची माहिती समोर आलेली नाही. मुंबई महानगरपालिकेने दिलेल्या माहितीनुसार, माटुंगा पोलीस ठाण्याच्या जवळ स्तर – १ ची आग लागली होती. एका रेशन दुकानात आग लागल्यानंतर इलेक्ट्रिक वायरिंगमुळे आग पसरली. ज्यामध्ये दुकानातील कागदपत्र, फर्निचर आणि इलेक्ट्रिक वस्तू जळून खाक झाल्या. अग्निशमन दल, पोलीस आणि बेस्टच्या प्रयत्नाने आग नियंत्रणात आणण्याचे प्रयत्न सुरू आहेत.
मुंबईच्या पश्चिम उपनगरातील अंधेरी पूर्व येथील महाकाली रोड, एमआयडीसीमधील भंगारवाडीतील दुकानांना भीषण आग लागली. या दुर्घटनेचे व्हिडीओ आता सोशल मीडियावर व्हायरल होत आहेत. अग्निशमन दलाच्या पाच ते सहा गाड्या घटनास्थळी दाखल झाल्या असून आग विझवण्याचा प्रयत्न करण्यात आले. दहा वाजण्याच्या सुमारास आगीवर नियंत्रण मिळविण्यात आले. आगीच्या घटनेचे नेमके कारण अद्याप समोर आलेले नाही.
गोरेगाव येथील हब मॉलजवळील लोढा फियोरेन्जा इमारतीला आगल लागल्याची घटना घडली. सायंकाळी ७.३५ दरम्यान आग लागल्याची माहिती मिळत आहे. इमारतीच्या ३० व्या मजल्यावर स्तर -१ ची आग लागली होती. अग्निशमन दलासह मुंबई पोलीस आणि अदाणी पॉवर कंपनीच्या कर्मचाऱ्यांनी आगीवर नियंत्रण मिळविण्याचे प्रयत्न केले. याही घटनेत कुणीही जखमी झालेले नाही.
मुंबईतील कामाठीपुरात दिवाळीच्या फटाक्यामुळे आग लागल्याची नुकतीच माहिती समोर आली आहे. मुंबादेवीचे आमदार अमिन पटेल हे घटनास्थळी पोहोचल्यानंतर त्यांनी आगीची माहिती दिली. कामाठीपुरातील गल्ली क्र. १२ च्या मैदानामागील कारखान्यात आग लागल्याची प्राथमिक माहिती हाती आली आहे.
