मुंबई : उद्वाहनासह पहिला पादचारी पूल कांदिवलीमध्ये!

कांदिवली पश्चिमेकडील लालजी पाडा येथे पालिकेतर्फे एक पादचारी पूल तयार करण्यात येणार आहे. या पुलाला सरकत्या जिन्यांबरोबरच उदवाहनाची सोयही देण्यात येणार आहे. त्याकरीता कंत्राटदाराची नेमणूक करण्यात आली आहे. मुंबईतील हा या प्रकारचा पहिलाच पूल असेल. यापूर्वी मुंबईत किंग्ज सर्कल येथे पालिकेने पहिला सरकता जिना असलेला पूल तयार केला होता. त्यानंतर आता बहुतांशी पादचारी पुलांना सरकते जिने बसवण्यात येणार आहे. मात्र उदवाहनाची सोय असलेला हा पहिला पूल कांदिवलीत तयार होणार आहे. या पुलासाठी पालिकेने न्यू लिंक रोड आणि वाडीलाल गोसालिया रोड या परिसराचे सर्वेक्षण केले होते. त्यावेळी या रस्त्याचा रोज किती पादचारी वापर करताता त्याचा आढावा घेण्यात आला होता. त्यात या मार्गाने सरासरी किमान २७ हजार पादचारी रस्ता ओलांडून जात असल्याचे आढळून आले होते. त्यामुळे या पुलाची आवश्यकता असल्याचे मत भाजपचे माजी नगरसेवक कमलेश यादव यांनी व्यक्त केले आहे. यादव यांनी या पुलाची मागणी गेल्यावर्षी केली होती. त्यानुसार आता हा पूल बांधण्यात येणार आहे.

हेही वाचा – मुंबई महानगरपालिकेच्या उद्यानांमध्ये पुन्हा संगीत मैफली

या पुलाच्या व उदवाहनाच्या देखभालीची पाच वर्षांची जबाबदारी देण्यात आली आहे. पूल बांधणे आणि देखभाल या कामासाठी ५ कोटी ६९ लाख रुपये खर्च होणार आहे. पुढील दोन वर्षांत हा पूल बांधून तयार होणार आहे.

हेही वाचा – मुंबईतील तापमान वाढणार

रहिवासी, विद्यार्थ्यांना फायदा होणार

आठ शाळांमधील आठ ते नऊ हजार मुले रोज रस्ता ओलांडून जात असतात. पूल झाल्यास लालजी पाडा, गणेश नगर, इंदिरा नगर, संजय नगर, जनता कॉलनी, अभिषेक नगर येथील रहिवाशांना फायदा होणार आहे.