मुंबई : तीन अल्पवयीन मुलींसोबत अश्लील वर्तन करणाऱ्या सुरक्षा रक्षकाला अटक

पीडित मुली बुधवारी राहत्या इमारतीच्या गच्चीवर गेल्या होत्या. दोन मुली ११ वर्षांच्या, तर एक मुलगी १० वर्षांची आहे. इमारतीचा सुरक्षा रक्षक असलेला आरोपी त्यावेळी तेथेच होता. तक्रारीनुसार, आरोपीने पीडित मुलींसोबत जवळीक साधण्याचा प्रयत्न केला. तसेच त्यांना अश्लीलरित्या स्पर्श केला. हा प्रकार एका पीडित मुलीने आईला सांगितला. त्यावेळी इतर मुलींसोबतही असा प्रकार घडल्याचे त्यांना समजले. त्यांनी तातडीने स्थानिक भोईवाडा पोलिसांकडे तक्रार केली. त्यानुसार पोलिसांनी भारतीय न्याय संहिता कलम ७४ (विनयभंग) व पोक्सो कायदा ८ व १२ अंतर्गत गुन्हा दाखल केला. पोलिसांचे पथक तात्काळ घटनास्थळी पोहोचले. पोलिसांनी परळ रेल्वे स्थानकाजवळून आरोपीला अटक केली. आरोपी ठाण्यातील दिवा परिसरातील रहिवासी आहे. आरोपी त्याच इमारतीतची सुरक्षा रक्षक असून यापूर्वीही त्याने असा प्रकार केला होता का ? याबाबत चौकशी सुरू आहे. याप्रकरणी अधिक तपास सुरू असल्याचे पोलिसांनी सांगितले.

अल्पवयीन मुलांविरोधात घडलेल्या गुन्ह्यांमध्ये वाढ

मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ मध्ये पोक्सो कायद्या अंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्या अंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.

२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांची उकल होण्याचे प्रमाण अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घडनांमध्ये बहुसंख्य आरोपी परिचीत व्यक्त आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले आहे.