शाळेतील समुपदेशनात मुलीवर लैंगिक अत्याचार उघड; आरोपी पित्याला ट्रॉम्बे पोलिसांकडून अटक

१३ वर्षांची तक्रारदार मुलगी शालेय विद्यार्थिनी आहे. तिच्या शाळेत स्वयंसेवी संस्थेच्या मदतीने सर्व विद्यार्थ्यांचे समुपदेशन करण्यात आले. त्यावेळी पीडित मुलगी बोलण्यास घाबरत होती. तिला विश्वासात घेऊ विचारले असता गेल्या दोन वर्षांपासून आई कामावर गेल्यावर सावत्र वडील विनयभंग करीत असल्याचे तिने सांगितले. त्यानंतर समुपदेशन करणाऱ्या महिलेने पीडित मुलीला विश्वासात घेऊन विचारले असता तिने सर्व प्रकार सांगितला.

पीडित मुलीच्या आईला शाळेत बोलावून हा प्रकार सांगण्यात आला. त्यानंतर पीडित मुलीच्या आईने याप्रकरणी पोलिसांकडे तक्रार करण्याचा निर्णय घेतला. त्यांनी ट्रॉम्बे पोलिसांकडे तक्रार केली. त्या तक्रारीच्या आधारावर पोलिसांनी ३७ वर्षीय पित्याविरोधात विनयभंग व पोक्सो कायद्याअंतर्गत गुन्हा दाखल केला. त्यानंतर पोलिसांनी आरोपी पित्याला राहत्या घरातून अटक केली. याप्रकरणी ट्रॉम्बे पोलीस अधिक तपास करीत आहेत.

अल्पवयीन मुलांविरोधात घडलेल्या गुन्ह्यांमध्ये वाढ

मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ पोक्सो कायद्याअंतर्गत ११०८ गुन्ह्यांची नोंद झाली होती. मुंबईत २०२४ मध्ये पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.

२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याच्या प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घटनांमध्ये बहुसंख्य आरोपी परिचित व्यक्ती आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.