मुंबई : मुंबई महानगरपालिकेने वर्सोवा येथील पाच अनधिकृत बहुमजली इमारती पाडून टाकल्या. मुंबई महानगरपालिकेच्या के – पश्चिम विभाग कार्यालयाने ही निष्कासनाची कारवाई केली. येत्या काळात आणखी ३५ अनधिकृत बांधकामे पाडण्यात येणार आहेत.
पश्चिम उपनगरात अंधेरी येथून जवळ असलेल्या वर्सोवा भागात समुद्र किनारपट्टी आहे. या भागातील पर्यावरणाच्या दृष्टीने संवेदनशील असलेल्या दलदलीच्या प्रदेशात आणि सागरी किनारा व्यवस्थापन क्षेत्रात (कोस्टल रेग्यूलेशन झोन) ही अनधिकृत बांधकामे उभी राहिली होती. या बांधकामाशी संबंधितांना मुंबई महापालिकेच्या के – पश्चिम विभागाने वेळोवेळी नोटीस बजावली होती. बांधकाम निष्कासित करण्यासंदर्भात महानगरपालिका प्रशासनाच्या वतीने वेळोवेळी कळविण्यात येत होते. तरीही त्यांच्याकडून काही कारवाई न करण्यात आल्याने तसेच दलदलीच्या क्षेत्रातील या अनधिकृत बांधकामामुळे जीवितहानी होण्याची शक्यता असल्याने मुंबई महापालिकेने ही कारवाई केली. मुंबई महानगरपालिकेच्या परिमंडळ ४ च्या उपायुक्त डॉ. भाग्यश्री कापसे आणि सहायक आयुक्त चक्रपाणी अल्ले यांच्या नेतृत्वाखाली ही कारवाई करण्यात आली.
वर्सोवा भागातील सागरी किनारा व्यवस्थापन क्षेत्रातील (कोस्टल रेग्यूलेशन झोन) तेरे गल्लीतील कुटूर हाऊस (तळमजला ५), वेसावे पंप हाऊससमोरील साई श्रद्धा निवास (तळमजला १), गोमा गल्ली येथील नागा हाऊस (तळमजला ४), मांडवी गल्ली येथील झेमणे हाऊस (तळमजला ३), बाजार गल्ली येथील गणेश सागर (तळमजला ३) या इमारतींचे मागील वर्षभराच्या कालावधीत अनधिकृतपणे बांधकाम करण्यात आल्याचे निदर्शनास आले. बांधकामासाठी प्रशासनाकडून कोणत्याही प्रकारची परवानगी घेण्यात आली नव्हती. त्यामुळे पालिकेने ही निष्कासनाची कारवाई केली. ३५ हँड ब्रेकर, ८ गॅस कटर तसेच ८ जनरेटरच्या सहाय्याने इमारतीचे पाडकाम करण्यात आले. या कारवाईदरम्यान महानगरपालिकेच्या ८० अधिकारी-कर्मचारी यांच्यासह पुरेसा पोलीस बंदोबस्त तैनात करण्यात आला होता.
दरम्यान, वर्सोवा भागातील सागरी किनारा व्यवस्थापन क्षेत्रात (कोस्टल रेग्यूलेशन झोन) अशाप्रकारच्या आणखी ३५ अनधिकृत इमारती बांधण्यात आल्याचे महानगरपालिकेच्या निदर्शनास आले आहे. ही बांधकामेही याच कारवाई अंतर्गत पुढील काही दिवसांमध्ये पाडण्यात येतील, असे मुंबई महानगरपालिका प्रशासनाने स्पष्ट केले आहे.
गेल्यावर्षीही कारवाई…
वर्सोवा परिसरातील अनधिकृत बांधकामांचा मुद्दा नेहमीच चर्चेत असतो. अनधिकृत बांधकामे, मोठ्या प्रमाणात अनधिकृत फेरफार, मोकळ्या जमिनीवरील बांधकामे, विशेषतः सागरी किनारा क्षेत्र व्यवस्थापन परिसरात व दलदलीच्या जमिनीवर अनाधिकृत बांधकामांविषयी प्रशासनाकडे मोठ्या प्रमाणात तक्रारी प्राप्त होत असतात. या बांधकामांवर कारवाई करण्याकरीता वारंवार सांगूनही त्याकडे दुर्लक्ष केल्यामुळे गेल्या वर्षी जून २०२४ मध्ये पालिका आयुक्त भूषण गगराणी यांनी एका अभियंत्याला निलंबित केले होते. त्यानंतर आयुक्तांच्या आदेशानुसार वर्सोवामधील अनधिकृत बांधकामांवर कारवाईसाठी एक विशेष पथकही नेमण्यात आले होते.
