मुंबई : देशातील आयआयटीसह अन्य राष्ट्रीय स्तरावरील अभियांत्रिकी संस्थांमध्ये प्रवेशासाठी आवश्यक असलेल्या संयुक्त प्रवेश परीक्षा-मुख्य (जेईई-मेन्स) २०२६ च्या तारखा राष्ट्रीय परीक्षा कक्षाकडून (एनटीए) जाहीर करण्यात आल्या. जेईई मेन्स ही परीक्षा दोन सत्रामध्ये होणार असून परीक्षेचे पहिले सत्र २१ ते ३० जानेवारी तर दुसऱ्या सत्राची परीक्षा १ ते १० एप्रिलदरम्यान होणार आहे.
जेईई मेन्स ही परीक्षा जानेवारी आणि एप्रिल २०२६ अशा दोन सत्रांत होणार असल्याचे यापूर्वीच राष्ट्रीय परीक्षा कक्षाकडून जाहीर करण्यात आले होते. त्यामुळे देशातील लाखो विद्यार्थ्यांचे लक्ष असलेल्या जेईई-मेन्स परीक्षेच्या तारखा आता राष्ट्रीय परीक्षा कक्षाने जाहीर केल्या आहेत. परीक्षेचे पहिले सत्र २१ ते ३० जानेवारी तर दुसरे सत्र १ ते १० एप्रिलदरम्यान होणार आहे. पहिल्या सत्रासाठीची अर्जनोंदणी सुरू झाली असून दुसऱ्या सत्राच्या परीक्षेसाठीची अर्जनोंदणी जानेवारी २०२६ च्या अखेरीस सुरुवात होणार आहे. विद्यार्थ्यांना त्यांच्या जिल्ह्यात परीक्षा केंद्र मिळावे यासाठी यंदा राष्ट्रीय परीक्षा एजन्सीने अधिकाधिक शहरांमध्ये परीक्षेची केंद्रे सुरू करण्यासाठी प्रयत्नशील आहे. त्यामुळे परीक्षेसाठी लांबच्या शहरात प्रवास करण्याचा विद्यार्थ्यांचा त्रास कमी होणार आहे.
या परीक्षेच्या अर्ज नोंदणीसाठीची आवश्यक लिंक https://jeemain.nta.nic.in या संकेतस्थळावर उपलब्ध करून देण्यात येणार असल्याचेही एनटीएकडून जाहीर करण्यात आले आहे. परीक्षेसाठी इच्छुक असलेल्या विद्यार्थ्यांनी संयुक्त प्रवेश परीक्षा – २०२६ संदर्भातील अधिक माहिती आणि सूचनांसाठी नियमितपणे एनटीएचे अधिकृत संकेतस्थळ http://www.nta.ac.in आणि https://jeemain.nta.nic.in/ ला भेट देण्याचा सल्ला देण्यात आला आहे.
कागदपत्रे सज्ज ठेवा
ऑनलाईन अर्ज करताना विद्यार्थ्यांना कोणत्याही तांत्रिक अडचणींचा सामना करावा लागू नये यासाठी विद्यार्थांनी आवश्यक कागदपत्रे सज्ज ठेवावीत असा सल्ला एनटीएने दिला आहे. त्यानुसार विद्यार्थ्यांनी जेईई -मेन्स २०२६ साठी अर्ज करण्यापूर्वी आधार कार्डमधील नाव, जन्मतारीख (दहावीच्या प्रमाणपत्रानुसार), नवीन छायाचित्र, पत्ता आणि वडिलांचे नाव अद्ययावत करून ठेवावे. त्याचबरोबर दिव्यांग विद्यार्थ्यांनी त्यांच्या यूडीआयडी कार्डची वैधता तपासून घ्यावी. आवश्यकतेनुसार त्याचे अद्ययावतीकरण किंवा नूतनीकरण करून घ्यावे. ईडब्ल्यूएस, एससी, एसटी, ओबीसी-एनसीएल या आरक्षणाचा लाभ घेणाऱ्या विद्यार्थ्यांचे श्रेणी प्रमाणपत्र अद्ययावत व वैध असणे आवश्यक असल्याने त्यांनी ते अद्ययावत करून घ्यावे, अशा सूचना एनटीएकडून विद्यार्थ्यांना देण्यात आल्या आहेत. जेणेकरून प्रवेश प्रक्रियेच्या कोणत्याही टप्प्यात विद्यार्थ्यांना अडचणींना तोंड द्यावे लागणार नसल्याचे एनटीएकडून स्पष्ट करण्यात आले आहे.
