‘लोकसत्ता’च्या ‘सर्वकार्येषु सर्वदा’ दानयज्ञात यंदाही दात्यांनी घसघशीत दान देत सेवाव्रतींच्या कार्याला भक्कम पाठबळ दिले आहे. या दानयज्ञाचा सांगता सोहळा बुधवार, ३० ऑक्टोबर रोजी रवींद्र नाटय़मंदिर, प्रभादेवी येथे होणार असून, त्यास ज्येष्ठ अभिनेते दिलीप प्रभावळकर हे प्रमुख पाहुणे म्हणून उपस्थित राहणार आहेत.
विविध क्षेत्रांत विधायक काम करणाऱ्या संस्थांची ओळख करून देणाऱ्या ‘सर्वकार्येषु सर्वदा’ उपक्रमाचे यंदाचे नववे पर्व. या नऊ वर्षांत दानशूरांनी ९२ संस्थांना मदतीचा हात देत त्यांच्या कार्याला भक्कम पाठबळ दिले आहे. या उपक्रमांतर्गत यंदा गणेशोत्सवादरम्यान १० संस्थांची माहिती ‘लोकसत्ता’मध्ये प्रसिद्ध करण्यात आली. या संस्थांना राज्यासह दूरवरून मदतीचा ओघ आला.
कधी?
बुधवार, ३० ऑक्टोबर
कुठे?
मिनी थिएटर, रवींद्र नाटय़मंदिर, सिद्धिविनायक मंदिराजवळ, प्रभादेवी
कार्यक्रम सर्वासाठी खुला असून,
प्रथम येणाऱ्यास प्राधान्य.
महापुरामुळे नुकसान झालेले सांगली जिल्हा नगर वाचनालय, तिवरे येथील न्यू इंग्लिश स्कूल, किनवटमधील सानेगुरुजी रुग्णालय, अमरावतीतील शाश्वत कन्सेप्ट स्कूल; वंचित, गरीब, शेतमजुरांच्या मुलांसाठी आधारवड ठरलेले स्नेहवन, पन्हाळ्यातील नवशिक्षण प्रसारक मंडळ, संगीत प्रसार करणारी स्वरांकित, बदलापुरातील अपंग प्राण्यांचे अनाथाश्रम-पाणवठा, नॅशनल असोसिएशन फॉर द वेल्फेअर ऑफ फिजिकली चॅलेंज्ड, ठाण्यातील वसुंधरा संजीवनी मंडळ या संस्थांचा यंदाच्या ‘लोकसत्ता’च्या ‘सर्वकार्येषु सर्वदा’च्या उपक्रमात समावेश करण्यात आला होता. उपक्रमाच्या सांगता सोहळ्यामध्ये मदतीचे धनादेश संस्थांच्या प्रतिनिधींकडे सुपूर्द करण्यात येतील.
