मुंबई : गर्भवती महिला तसेच ग्रामीण भागातील रूग्ण असोत की अपघातग्रस्त व्यक्ती असो या सर्वांना वेळेत रुग्णालयात नेण्यात रुग्णवाहिकचे महत्त्व अनन्यसाधारण असते. यासाठी आरोग्य विभागाअंतर्गत रुग्णवाहिका सेवा गतिमान करण्याचा निर्णय आरोग्य विभागाने घेतला असून याचाच एक भाग म्हणून आगामी काळात तब्बल १७०० नवीन रुग्णवाहिका खरेदी करण्यात येणार आहेत.
यासाठी सुमारे ८७२ कोटी रुपये खर्च येणार असून यातील ४९ टक्के रक्कम आरोग्य विभाग तर उर्वरित ५१ टक्के रक्कम ज्या संस्थेच्या माध्यमातून ही रुग्णवाहिका सेवा चालवण्यात येणार आहे त्यांनी खर्च करावयाची आहे.
राज्यात सार्वजनिक आरोग्य विभाग तसेच एमएसआरडीसी, एनएचएआय, अशा अनेक संस्थाच्या वतीने रुग्णवाहिका सेवा देण्यात येतात. या सर्व रुग्णवाहिकांचे एकत्रित नेटवर्क व संचलन, मॉनिटरींग करण्याचा प्रस्तावही आरोग्य विभागाच्या विचाराधीन आहे. सध्या आरोग्य विभागाअंतर्गत १०८ रुग्णवाहिकेसोबतच १०२, १०४ व ११२ या क्रमांकाच्या रुग्णवाहिकाही कार्यरत आहेत.
सध्या आरोग्य विभागाकडे १०८ क्रमांकाच्या ९३७ रुग्णवाहिका आहेत तर १०२ क्रमांकाच्या ३५०० रुग्णवाहिका असून नंदुरबारसारख्या ठिकाणी काही बोट रुग्णवाहिका कार्यरत आहेत. याशिवाय बाईक रुग्णवाहिका ही संकल्पानाही राबवण्यात येत असून त्यालाही गती देण्याचा निर्णय घेण्यात आला आहे. नव्याने खरेदी करण्यात येणार्‍या सतराशे रुग्णवाहिकांमध्ये काही रुग्णवाहिका या नवजात अर्भकांसाठी असतील तर नंदुरबारसारख्या भागाचा विचार करून बोट रुग्णवाहिका घेण्यात येणार आहेत.
याबाबत आरोग्यमंत्री प्रकाश आबीटकर यांच्या अध्यक्षतेखाली मंत्रालयात एक बैठक आयोजित करण्यात आली होती. या बैठकीत आरोग्यमंत्री आबीटकर यांनी आरोग्य विभागाअंतर्गतच्या विविध रुग्णवाहिकांचे सूत्रबद्ध नियोजन करण्यावर भर दिला तसेच याबाबत योजना तयार करण्याचे आदेश संबंधितांना दिले. या बैठकीला आरोग्य राज्यमंत्री मेघना साकोरे – बोर्डीकर, आरोग्य सचिव डॉ. निपुण विनायक, आरोग्य सेवा आयुक्त डॉ. कादंबरी बलकवडे, परिवहन आयुक्त, तसेच आपत्कालीन रुग्णवाहिका सेवा पुरवठादार व त्यांचे यांची प्रतिनिधी उपस्थित होते.
राज्याच्या रुग्णसेवेत लवकरच नवीन अत्याधुनिक १५२८ अत्याधुनिक १०८ रुग्णवाहिका घेण्यात येणार असून यातील नोव्हेंबर व डिसेंबर महिन्यात ५०० रुग्णवाहिका घेण्यात येणार आहेत. या सर्व रुग्णवाहिका निर्धारित केलेल्या वेळेत सेवेत रूजू करून आवश्यकतेनुसार (लोकेशन ) ठिकाने निश्चित करण्याच्या सूचना या बैठकीत देण्यात आल्या.
नवीन अत्याधुनिक १०८ रुग्णवाहिकेसोबतच सध्या १०२,१०४ न ११२ क्रमांकाच्या रुग्णवाहिका कार्यरत आहेत. त्या एमएसआरडीसी, एनएचएआय या संस्थांच्या वतीने महामार्गावर, टोल नाक्यावर, रुग्णवाहिका तैनात करण्यात आल्या आहेत. या सर्व रुग्णवाहिकांचे एकत्रित नेटवर्क तयार केल्यास रुग्णांना गोल्डन अवर मध्ये जलद रुग्णसेवा उपलब्ध होईल, त्यामुळे याबाबत नियोजन करण्यात यावे असे आरोग्यमंत्र्यांनी सांगितले.
आरोग्य विभागाच्या १०८ क्रमाकांच्या रुग्णवाहिका सेवावर “महाराष्ट्र शासन” असे स्पष्ट लिहिण्यात यावे असेही आरोग्यमंत्र्यांनी या बैठकीत सांगीतले. या रुग्णवाहिकांवर कोणत्याही कंपनीचे नाव किंवा चिन्हे वापरू नये. पुरवठादार संस्थेने, रुग्णवाहिकेवर आपल्या कंपनीची नव्हे तर महाराष्ट्र शासनाचा उपक्रम असल्याचे जाहीर आवश्यक आहे.
