‘नीट’मुळे विधि तीन वर्ष अभ्यासक्रमाच्या सीईटी परीक्षेत बदल…, आता परीक्षा ४ मेऐवजी २ मे रोजी होणार…

राष्ट्रीय चाचणी संस्थेतर्फे संपूर्ण देशामध्ये ४ मे रोजी नीट परीक्षा घेण्यात येत आहे. या परीक्षेसाठी एनटीएने राज्यातील सरकारी महाविद्यालयांमधील काही जिल्हा परीक्षा केंद्रे आरक्षित केली आहेत. ही परीक्षा केंद्रे राज्य सामाईक प्रवेश परीक्षा कक्षाने विधि तीन वर्षे अभ्यासक्रमाच्या प्रवेशासाठी आरक्षित केली होती. एनटीएने नीट परीक्षेसाठी राज्यातील २८ परीक्षा केंद्र आरक्षित केली आहेत. एनटीएकडून आरक्षित केलेल्या परीक्षा केंद्रांची माहिती २२ व २३ एप्रिल रोजी राज्य सामाईक प्रवेश परीक्षा कक्षाला मिळाली.

नीट ही देशपातळीवरील परीक्षा असल्याने सीईटीसाठी या केंद्रांचा वापर करता येणार नाही. आरक्षित केलेल्या परीक्षा केंद्रामुळे जवळपास ८ ते ९ हजार विद्यार्थ्यांना परीक्षा देण्यात अडचणी निर्माण होण्याची शक्यता आहे. त्याचप्रमाणे मे २०२५ मध्ये राज्यातील विद्यापीठ आणि महाविद्यालयीन परीक्षा सुरू होणार आहेत. त्यामुळे विधि तीन वर्षे अभ्यासक्रमाची सीईटी पुढे ढकलणे शक्य नाही. सीईटीच्या तारखा पुढे ढकलल्यास केंद्रीभूत प्रवेश प्रक्रियेला विलंब होऊ शकतो आणि त्यामुळे विधि महाविद्यालये विलंबाने सुरू होण्याची शक्यता आहे.

विधि तीन वर्षांच्या सीईटी २०२५ परीक्षेसाठी नोंदणी केलेल्या उमेदवारांची संख्या सुमारे ९५ हजार इतकी आहे. त्यामुळे अधिकाधिक विद्यार्थ्यांना त्यांच्या पसंतीचे केंद्र मिळावे यासाठी राज्य सामाईक प्रवेश परीक्षा कक्षाने ४ मे रोजी होणारी विधि तीन वर्षे अभ्यासक्रमाची सीईटी २ मे रोजी घेण्याचा निर्णय घेतला आहे. तर ३ मे रोजी होणारी सीईटी ही नियोजित वेळापत्रकानुसार होणार असल्याचे राज्य सामाईक प्रवेश परीक्षा कक्षाचे आयुक्त दिलीप सरदेसाई यांनी सांगितले.

लॉगिन आयडीवर प्रवेश पत्र उपलब्ध

राज्य सामाईक प्रवेश परीक्षा कक्षाच्या नियोजित वेळापत्रकानुसार ३ मे रोजी ३८ हजार, तर ४ मे रोजी ५७ हजार विद्यार्थ्यांची परीक्षा घेण्यात येणार होती. मात्र नव्या वेळापत्रकानुसार ४ मे रोजी होणारी परीक्षा २ मे रोजी होणार आहे. साधारण ५७ हजार विद्यार्थ्यांची परीक्षा २ मे रोजी होणार आहे. या सर्व विद्यार्थ्यांना २८ एप्रिल रोजी दुपारी २ नंतर त्यांच्या लॉगिन आयडीवर प्रवेशपत्र पाठविण्यात आले आहे.

विद्यार्थ्यांना समाजमाध्यमांद्वार सूचना

विद्यार्थ्यांना नियोजित वेळापत्रकात बदल करण्यात आल्याची माहिती राज्य सामाईक प्रवेश परीक्षा कक्षाने एसएमएस, व्हॉट्स ॲप, नोंदणीकृत ई-मेल आयडी, संकेतस्थळावर जाहीर सूचना या माध्यमातून देण्यात आल्याचे दिलीप सरदेसाई यांनी सांगितले.

परराज्यातील विद्यार्थ्यांची ३ मे रोजी परीक्षा

परराज्यातून सीईटी परीक्षेसाठी येणाऱ्या विद्यार्थ्यांना तिकिट आरक्षणाबरोबरच राहण्याची आगाऊ व्यवस्था करावी लागते. त्यामुळे या विद्यार्थ्यांचा त्रास वाढू नये यासाठी परराज्यातील विद्यार्थ्यांची परीक्षा ३ मे रोजी घेण्यात येणार असल्याचे दिलीप सरदेसाई यांनी सांगितले.

सीए, सीएसची परीक्षा देणाऱ्या विद्यार्थ्यांना दिलासा

सीए व सीएसची परीक्षा ४ मे रोजी होणार होती. विधि तीन वर्ष अभ्यासक्रमाची सीईटी याच दिवशी होणार होती. त्यामुळे विधि तीन वर्ष अभ्यासक्रमाच्या सीईटी परीक्षेत बदल करावा, अशी मागणी विद्यार्थ्यांनी केली होती. आता करण्यात आलेल्या बदलानुसार सीए, सीएसची परीक्षा देणाऱ्या विद्यार्थ्यांना दिलासा मिळणार आहे.