पाकिस्तानी कपडे विकू नका, मनसेचा जारा शोरूमला इशारा

मनसेच्या कार्यकर्त्या रीटा गुप्ता यांच्या नेतृत्त्वाखाली काही कार्यकर्त्यांनी शोरुममध्ये गोंधळ घातला, असे वृत्त हिंदुस्थान टाइम्सने दिले आहे. पाकिस्तानी कपडे विकू नका, अशी सूचना व्यवस्थापनाला दिली आहे. जर त्यांनी कपड्यांची विक्री बंद केली नाही तर त्यांना परिणामांना सामोरे जावे लागेल, असा इशारा गुप्ता यांनी दिला. याआधी महाराष्ट्र नवनिर्माण सेनेने पाकिस्तानी चित्रपट कलाकारांविरुद्ध आंदोलन केले होते.

पाकिस्तानी कलाकार असलेले चित्रपट प्रदर्शित करू दिले जाणार नाहीत, असे मनसेने म्हटले होते. ऐ दिल है मुश्कील आणि रईस चित्रपटामध्ये पाकिस्तानी कलाकारांनी काम केले होते. त्या चित्रपटांच्या प्रदर्शनाला मनसेने विरोध केला होता. उरीमध्ये हल्ला झाल्यानंतर पाकिस्तानी कलाकारांच्या चित्रपटांना विरोध करण्यात आला. पाकिस्तानी गायक गुलाम अली यांच्या कार्यक्रमांवरही शिवसेनेने बंदी घातली होती. परंतु यावेळी प्रथमच पाकिस्तानचे कपडे विकू नका, अशी मागणी राजकीय पक्षाकडून करण्यात आली आहे.