मुंबई : पूर्व – मध्य अरबी समुद्रात कोकण किनारपट्टीवर ठळक कमी दाब क्षेत्राची निर्मिती झाली आहे. याचबरोबर वाऱ्याची चक्राकार स्थिती आहे. याचाच परिणाम म्हणून कोकणासह दक्षिण, पश्चिम आणि मध्य महाराष्ट्रात पुढील चार ते पाच दिवस संततधार पावसाचा अंदाज हवामान विभागाने व्यक्त केला आहे.
राज्यात सध्या पावसाला पोषक वातावरण निर्माण झाले आहे. मागील दोन – तीन दिवसांपासून अनेक भागात पावसाने जोरदार हजेरी लावली. कोकणातील काही ठिकाणी शुक्रवारीही मुसळधार पाऊस कोसळत होता. दरम्यान, पूर्व-मध्य अरबी समुद्रात कोकण किनारपट्टीवर ठळक कमी दाब क्षेत्राची निर्मिती झाली आहे. ही प्रणाली उत्तरेकडे सरकरण्याची शक्यता असून त्याची तीव्रता आणखी वाढेल, असा अंदाज हवामान विभागाने व्यक्त केला आहे. तसेच या प्रणालीमुळे कोकण किनारपट्टीपासून दक्षिण मध्य महाराष्ट्र, दक्षिण मराठवाडा, उत्तर तेलंगणा ते दक्षिण छत्तीसगडपर्यंत हवेचा कमी दाबाचा पट्टा सक्रिय आहे. या दोन्ही प्रणालींच्या प्रभावामुळे पुढील चार ते पाच दिवस कोकण, मध्य महाराष्ट्र, मराठवाडा आणि विदर्भात पावसाची शक्यता वर्तविण्यात आली आहे. या कालावधीत काही भागात सोसाट्याच्या वाऱ्यांसह पाऊस कोसळण्याची शक्यता आहे. तर, काही भागात मेघगर्जनेसह पावसाची शक्यता आहे.
मुंबईत असह्य उकाडा
मुंबईत शुक्रवारी अतिमुसळधार पावसाचा इशारा हवामान विभागाने दिला होता. मात्र, दिवसभर उष्ण व दमट वातावरणामुळे मुंबईकर हैराण झाले होते. दरम्यान, हवामान विभागाने शनिवारीही मुसळधार पावसाचा इशारा दिला होता. मात्र, सुधारीत अंदाजानुसार शनिवारी मुंबई, ठाणे आणि पालघरमध्ये काही भागात वादळी वाऱ्यासह पाऊस पडेल. यावेळी काही ठिकाणी सोसाट्याचा वारा असेल, असा अंदाज वर्तविण्यात आला आहे.
पावसाचा अंदाज कुठे
गडगडाटासह पावसाचा अंदाज
मुंबई, ठाणे, पालघर, नाशिक, अहिल्यानगर, सोलापूर, परभणी, बीड, हिंगोली, धाराशिव.
अतिमुसळधार पावसाचा इशारा
रायगड, रत्नागिरी, सिंधुदुर्ग, पुणे, नांदेड, लातूर, बुलढाणा, यवतमाळ.
हलक्या सरींचा अंदाज
धुळे, नंदुरबार, जळगाव, कोल्हापूर, सातारा, सांगली , जालना, छत्रपती संभाजीनगर.
नैऋत्य मोसमी वारे जैसे थे
नैऋत्य मोसमी वारे शुक्रवारीही एकाच जागी होते. मागील दोन दिवसांपासून मोसमी वारे त्याच भागात रेंगाळत आहेत. मात्र, मोसमी वाऱ्यांच्या वाटचालीसाठी पोषक वातावरण असल्याने पुढील एक ते दोन दिवसांत मोसमी वारे केरळमध्ये दाखल होतील, असा अंदाज हवामान विभागाने व्यक्त केला आहे. तसेच पुढील दोन दिवसांमध्ये दक्षिण अरबी समुद्राच्या आणखी काही भागात मोसमी वारे प्रगती करतील. मालदीव आणि कोमोरिनचा उरलेला भागही व्यापतील. तसेच लक्षद्वीप, केरळ, तमिळनाडू आणि ईशान्यकडील राज्यांमधील काही भागांतही मोसमी वारे दाखल होतील. बंगालच्या उपसागराच्या आणखी काही भागात दोन ते तीन दिवसांमध्ये मोसमी वारे वाटचाल करतील, अशी शक्यता हवामान विभागाने वर्तवली आहे.
