महाराष्ट्रातील तरुणांना जागतिक स्तरावर व्यवसायाची संधी मिळणार; महाराष्ट्र स्टेट इनोव्हेशन सोसायटीचे स्टार्टअप संदर्भात महत्त्वाचे सामंजस्य करार

कौशल्य विकास विभागाने सोमवारी फिनलंडसह ग्लोबल ॲक्सेस टू टॅलेंट फ्रॉम इंडिया (गती), मॅजिक बिलियन आणि चार्कोस एंटरप्रायझेस यांच्यासोबत प्लेसमेंट, संशोधन, गुंतवणूक आणि प्रशिक्षण उपक्रमांबाबत कौशल्य विकास, रोजगार आणि नाविन्यता मंत्री मंगलप्रभात लोढा यांनी सामंजस्य करार केले. या कार्यक्रमाला फिनलंडच्या उच्चायुक्त डॉ. इवा निल्सन, ‘मित्रा’चे अतिरिक्त मुख्याधिकारी अमन मित्तल, अतिरिक्त मुख्य सचिव मनीषा वर्मा, रतन टाटा कौशल्य विद्यापीठाच्या कुलगुरू अपूर्वा पालकर आणि व्यवसाय शिक्षण आणि प्रशिक्षण संचालनालयाच्या संचालिका माधवी सरदेसाई यावेळी उपस्थित होत्या. दरम्यान, सामंजस्य करार करण्यापूर्वी महाराष्ट्र स्टेट इनोव्हेशन सोसायटीच्या वतीने ‘विकसित महाराष्ट्र व्हिजन २०४७’ या विषयावर कार्यशाळेचे आयोजनही करण्यात आले होते.

कौशल्य विभागाअंतर्गत येणाऱ्या महाराष्ट्र स्टेट इनोव्हेशन सोसायटीने या कराराच्या माध्यमातून उद्योजकतेतील आंतरराष्ट्रीय सहकार्य मजबूत करण्याच्या दृष्टीने ऐतिहासिक पाऊल उचलल्याचे मंगलप्रभात लोढा यांनी सांगितले. कौशल्य विकास विभागाच्या धोरणाबाबत समाधान व्यक्त करताना या सामंजस्य कराराद्वारे महाराष्ट्राशी संबंध अधिक दृढ करता येतील. याशिवाय दोन्ही देशातील स्टार्टअपसाठी नव्या संधी निर्माण होईल, असा विश्वास फिनलंडच्या उच्चायुक्त डॉ. इवा निल्सन यांनी व्यक्त केला. या कराराद्वारे महाराष्ट्रातील स्टार्ट अप्स जागतिक स्तरावर आपला ठसा उमटवतील. तसेच या करारामुळे इतर उद्योजकांचीही नवी ओळख निर्माण होईल,असे अतिरिक्त मुख्य सचिव मनीषा वर्मा यांनी सांगितले.

महाराष्ट्रात अत्याधुनिक प्रशिक्षण केंद्र

नवप्रवर्तन, संशोधन, उद्योजकता आणि गुंतवणूक यासंदर्भात सहकार्य हे या सामंजस्य कराराचे मुख्य उद्दिष्ट असणार आहे. स्टार्टअपसाठी दोन्ही देशात संधी उपलब्ध करून देणे, विविध औद्योगिक क्षेत्रातील संशोधन, गुंतवणूक, रोजगार मेळावे, स्टार्टअप समिटसारखे नवप्रवर्तन कार्यक्रमाचे आयोजित करणे, तंत्रज्ञान हस्तांतरण आणि औद्योगिक संशोधन सहकार्य सक्षम करण्यावर अधिक भर देण्यात येणार आहे. त्याचबरोबर फिनलंडच्या कंपन्यांच्या सहकार्याने महाराष्ट्रात अत्याधुनिक प्रशिक्षण केंद्र स्थापन करण्याची रूपरेषा आखण्यात येणार आहे.