मुंबई : गतवर्षी मराठी भाषेला अभिजात भाषेचा दर्जा प्राप्त झाला. या अनुषंगाने राज्य शासनाने शासन निर्णय जारी करून ३ ऑक्टोबर हा दिवस ‘अभिजात मराठी भाषा सन्मान दिन’ आणि ३ ते ९ ऑक्टोबर हा सप्ताह ‘अभिजात मराठी भाषा सप्ताह’ म्हणून साजरा करण्याचे घोषित केले आहे. या सप्ताहअंतर्गत राज्याच्या मराठी भाषा विभागातर्फे मराठी भाषा दूत ही ऑनलाईन वक्तृत्व स्पर्धा घेण्यात येणार आहे. ही स्पर्धा जगभरातील १८ ते २१ वयोगटातील मराठी बोलणाऱ्यांसाठी खुली असेल. तसेच या स्पर्धेतील १०० सर्वोत्तम स्पर्धकांची ‘मराठी भाषा दूत’ म्हणून निवड करण्यात येणार आहे.
प्रत्येक स्पर्धकाला ‘अभिजात मराठी – माझ्या अपेक्षा’ या विषयावर व्यक्त होण्यासाठी जास्तीत जास्त तीन मिनिटांचा वेळ देण्यात येणार आहे. या स्पर्धेच्या संयोजनाची जबाबदारी ऑगस्ट मीडिया या संस्थेने सांभाळली आहे. ही वक्तृत्व स्पर्धा ८ ते २२ सप्टेंबर २०२५ या कालावधीत ऑनलाईन पद्धतीने घेण्यात येईल. महाराष्ट्रातील वेगवेगळे महसूल विभाग, तसेच बृहन्महाराष्ट्र मिळून प्रथम नोंदणी करणाऱ्या एक हजार स्पर्धकांना स्पर्धेत भाग घेता येईल.
स्पर्धकांनी विषयाचे आकलन करून संबंधित विषय आपल्या पद्धतीने मांडणे अपेक्षित आहे. सर्व स्पर्धकांना महाराष्ट्र शासनाच्या मराठी भाषा विभागातर्फे सहभाग प्रमाणपत्र देण्यात येईल. यासाठी ३१ ऑगस्ट २०२५ रोजी रात्री १२ पर्यंत प्रवेश अर्ज भरता येणार आहे. या स्पर्धेसाठी १८ ते २१ या वयोगटातील जास्तीत जास्त युवकांनी https://forms.gle/NYvWxvYCSFXCjkzn9 या लिंकवर नोंदणी करावी, असे आवाहन मराठी भाषा विभागातर्फे करण्यात आले आहे.
