मुंबई : पावसाळी आजारांचा भर ओसरला ; डेंग्यू आणि हिवतापाच्या रुग्णांत मात्र वाढ

मुंबईतील पावसाळी आजरांचा विशेषतः स्वाईन फ्लूचा भर ओसरू लागला आहे. मात्र हिवताप आणि डेंग्यूचा संसर्ग झालेल्या रुग्णांच्या संख्येत अजूनही वाढ होत आहे. सप्टेंबरच्या पहिल्या आठवड्यात स्वाईन फ्लूचे केवळ तीन रुग्ण आढळले आहेत. मात्र हिवतापाच्या ८९रुग्णांची नोंद झाली.
करोनाचा धोका ओसरत असला तरी यंदा स्वाईन फ्लूचे रुग्ण वाढत असल्यामुळे भीतीचे वातावरण होते. ऑगस्टच्या पहिल्याच आठवड्यात ८० रुग्ण आढळल्यामुळे आरोग्य विभागही सतर्क झाला होता. मात्र नंतर ही रुग्णसंख्या ओसरू लागली. सप्टेंबरच्या पहिल्या आठवड्यात ४ तारखेपर्यंत केवळ तीन नवीन रुग्ण आढळले. त्यामुळे स्वाईन फ्लूचा भर ओसरत असल्याचे चित्र आहे. यावर्षी आतापर्यंत स्वाईन फ्लूचे ३०१ रुग्ण आढळले आहेत तर दोघांचा मृत्यू झाला आहे.