बाजारातील विविध कंपन्यांच्या नुडल्स, पास्तातही ‘एमएसजी’

विविध ब्रँडना एफडीएकडून नोटिसा; दंड आकारणार
‘नेस्ले’च्या मॅगी नुडल्सनंतर अन्य कंपन्यांच्या नुडल्स तसेच पास्तामध्ये ‘मोनो सोडिअम ग्लुटामेट’ (एमएसजी) असल्याचे आढळून आले आहे. विशेष म्हणजे या कंपन्यांनी आपल्या ब्रँडवर ‘एमएसजी’ नसल्याचा उल्लेख केला आहे. राज्याच्या ‘अन्न व औषध प्रशासना’ने नेस्लेसह आयटीसी, चिंग्स, आला मसाला आदी ब्रँडना नोटिशी जारी केल्या असून त्यांच्याकडून दंड आकारला जाणार आहे. भविष्यात या कंपन्यांनी पुन्हा अशी चूक केल्यास त्यांच्यावर बंदी घातली जाऊ शकते, असे एका वरिष्ठ अधिकाऱ्याने स्पष्ट केले.
नेस्लेच्या मॅगी नुडल्समध्ये एमएसजीची मात्र प्रमाणापेक्षा अधिक आढळली होती. तसेच शिसेही काही प्रमाणात सापडल्यामुळे बंदी घालण्यात आली होती. त्यानंतर बाजारातील ‘मॅगी नुडल्स’ मागे घेण्यात आले होते. अलीकडेच मॅगी न्युडल्स पुन्हा बाजारात आणण्याला हिरवा कंदिल मिळाला आहे. या पाश्र्वभूमीवर ही मॅगी बाजारात आल्यानंतर त्याची पुन्हा चाचणी होणार असल्याचे अन्न व औषध प्रशासनाचे आयुक्त डॉ. हर्षदीप कांबळे यांनी स्पष्ट केले आहे. नेल्सेच्या मॅगी नुडस्ल मध्ये एमएसजीची मात्रा तसेच शिसे प्रमाणापेक्षा अधिक आढळल्यामुळे अन्न व औषध प्रशासनाने अन्य कंपन्यांच्या नुडल्स तसेच पास्ता ब्रँडची तपासणी सुरू केली होती.
या कंपन्यांनी भविष्यातील उत्पादनांमध्ये ही चूक टाळण्याचे मान्य केले आहे. याशिवाय सध्या बाजारातील साठाही मागे घेण्याचे मान्य केले आहे. त्यामुळे तूर्तास त्यांच्याविरुद्ध दंडात्मक कारवाई करण्यात येणार असल्याचेही या अधिकाऱ्याने स्पष्ट केले. या उत्पादनांमध्ये शिसाची मात्रा प्रमाणापेक्षा अधिक आढळलेली नाही. मात्र पाकिटावर जो उल्लेख केला आहे त्यापेक्षा काही अन्य बाबी आढळल्या आहेत.