मुंबईः अल्पवयीन मुलगी व तिच्या भावाला उद्यानात खेळायला नेण्याच्या बहाण्याने मुलीवर अत्याचार करणाऱ्याला अॅन्टॉपहिल पोलिसांनी अटक केली. घडलेला प्रकार कोणालाही सांगितल्यास मारण्याची धमकी आरोपीने पीडित मुलीला दिली होती. याप्रकरणी पोलिसांनी बलात्कार व बालकांचे लैंगिक अत्याचारापासून संरक्षण (पोक्सो) कायद्या अंतर्गत गुन्हा दाखल केला असून अधिक तपास सुरू आहे.
दहा वर्षांची पीडित मुलगी व तिचा अल्पवयीन भाऊ घरा शेजारी खेळत होते. त्यावेळी आरोपीने त्यांना उद्यानात नेण्याचे आमीष दाखवले. मुले तयार झाल्यानंतर आरोपीने त्यांना जवळच्या उद्यानात नेले. तेथे आरोपीने पीडित मुलीच्या भावाला खाऊ आणण्यासाठी उद्यानाच्या बाहेर पाठवले. तेथे मुलीसोबत कोणी नसल्याचा फायदा उचलून आरोपीने तिच्यासोबत अश्लील कृत्य केले. हा प्रकार कोणालाही सांगितल्यास ठार मारण्याची धमकी आरोपीने दिली.
त्यामुळे पीडित मुलगी घाबरली होती. तिने नुकताच हा प्रकार आईला सांगितला. त्यानंतर तिने याप्रकरणी पोलिसांकडे तक्रार केली. तक्रारीवरून अॅन्टॉपहिल पोलिसांनी बलात्कार व पोक्सो कायद्या अंतर्गत गुन्हा दाखल केला. तक्रारीनुसार, २० जुलै ते २६ जुलैच्या दरम्यान हा प्रकार घडला. याप्रकरणी पोलिसांनी आरोपीला अटक करण्यासाठी पोलीस पथक पाठवले. त्यानंतर त्याला अटक करण्यात आली. आरोपीने प्राथमिक चौकशीत गुन्हा केल्याचे कबुल केले. याप्रकरणी पोलीस अधिक तपास करत आहेत.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ पोक्सो कायद्या अंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्या अंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.
२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याच्या प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधात घडलेल्या अत्याचाराच्या घटनांमध्ये बहुसंख्य आरोपी परिचीत व्यक्त आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
