प्रेमात अडसर बनलेल्या पतीची प्रियकराच्या मदतीने हत्या, दोन तासांत गुन्हा उघड करण्यास पोलिसांना यश

ॲन्टॉप हिल परिसरातील राजीव गांधी नगर येथील न्यू ट्रांजिट कॅम्प परिसरात ही घटना घडली. तेथील अनाबिया औषध दुकानाजवळ ईस्माइल अली शेख (३७) पत्नी सुमय्या(२५) सोबत राहत होता. व्यवसायाने भरतकाम करणाऱ्या ईस्माईलची हत्या पत्नी सुमय्या व तिचा प्रियकर साकलाईन गोलम किब्रिया शेख ऊर्फ झप्पर (३०) यांनी केली.

परिसरातील रहिवाशांना सोमवारी सकाळी ८.३० च्या सुमारास घराच्या पहिल्या मजल्यावरील व्हरांड्यात रक्ताचे थेंब दिसले. त्यांनी तात्काळ याबाबत पोलिसांना माहिती दिली. माहिती मिळाताच ॲन्टॉप हिल पोलीस घटनास्थळी पोहोचले. ते घरात गेले असता तेथे इस्माइल शेख यांचा मृतदेह आढळला. त्यांच्या गळ्यावर धारदार शस्त्राचे वार केल्याचे निदर्शनास आले. मृतदेह शीव येथील लोकमान्य टिळक रुग्णालयात नेण्यात आला असून तेथील डॉक्टरांनी चाकूच्या हल्ल्यात त्याचा मृत्यू झाल्याचे सांगितले. ईस्माईलच्या चेहऱ्यावर व गळ्यावर वार करण्यात आले होते. त्यानंतर पोलिसांनी तातडीने ईस्माइलची पत्नी सुमय्याची चौकशी सुरू केली. मात्र, ती वारंवार विरोधाभासी उत्तरे देत होती, त्यामुळे पोलिसांनी तिच्यावर संशय आला. त्यानंतर समय्याला ॲन्टॉप हिल पोलीस ठाण्यात आणून तिची चौकशी केली असता तिने गुन्ह्याची कबुली दिली.

प्रियकर सकलाईनच्या मदतीने तिने ईस्माइलची हत्या केल्याचे कबुल केले. सकलाईन हा झवेरी बाजारातील सोन्याच्या दागिन्यांना पॉलिश करणाऱ्या कार्यशाळेत काम करतो आणि तो ॲन्टॉप हिल परिसरात राहतो. पोलिसांनी अवघ्या दोन तासांत सकलाईनला अटक केली. दोघांनी मिळून इस्माइलचा मृतदेह लपवण्याचा कट रचला होता, मात्र सकाळ होऊ लागल्याने घाबरून प्रियकर पळून गेला. ॲन्टॉप हिल पोलिसांनी दोघांना अटक केली असून, हत्या प्रकरणी गुन्हा दाखल करून पुढील तपास सुरू केला आहे.

प्रेमात अडसर

सुमय्या व सकलाईन यांच्यात प्रेमसंबंध होते. पती ईस्माईलचा त्यात अडथळा निर्माण होत होता. त्यातून सुमय्या व ईस्माईलमध्ये अनेक वेळा भांडण झाले होते. सोमवारीही त्यांचे भांडण झाले. त्यानंतर आरोपींनी पहाटे ३ ते ८.३० दरम्यान चाकूने ईस्माईलची हत्या केली. हत्येसाठी वापरण्यात आलेला चाकू पोलिसांनी जप्त केला. दोन्ही आरोपींविरोधात हत्येचा गुन्हा दाखल करण्यात आला आहे.