मुंबई : बहिणीला मारेन, तिला नांदवणार नाही, असे धमकावून अल्पवयीन मेहुणीवर अत्याचार करणाऱ्या २७ वर्षीय आरोपीला मुंबई पोलिसांनी अटक केली. आरोपीने पीडित मुलीचे चित्रीकरण करून इन्स्टाग्रामवर वायरल केल्याचा आरोप आहे. याप्रकरणी वाकोला पोलिसांनी बलात्कार व बालकांचे लैंगिक अत्याचारापासून संरक्षण (पोक्सो) कायद्याअंतर्गत गुन्हा दाखल केला आहे.
गेल्यावर्षी जून महिन्यात प्रथम आरोपीने पीडित मुलीला धमकावले होते. तिच्या बहिणीला मारेल, तिला नांदवणार नाही, अशी धमकी देऊन आरोपीने पीडित मुलीवर अत्याचार केला. त्यानंतर आरोपी पीडित मुलीला धमकावू लागला. आंघोळ करताना व्हिडिओ कॉल करण्यासाठी दबाव टाकू लागला. आरोपीने चार-पाच वेळा व्हिडिओ कॉल करून पीडित मुलीचे चित्रीकरण केले. त्यानंतर आरोपीने चित्रीकरणाची धमकी दाखवून पुन्हा ४ ते ५ वेळा पीडित मुलीला धमकी दिली. तसेच हा प्रकार कोणाला सांगितल्यास सर्व चित्रफिती समाज माध्यमांवर वायरल करण्याची धमकी दिली.
त्यानंतर आरोपीने वेगवेगळ्या नावाने इन्स्टाग्रामवर बनावट आयडी तयार करून पीडित मुलीच्या चित्रफिती तिच्या आई-वडिलांना पाठवल्या. त्यामुळे त्यांना धक्का बसला. त्यांनी पीडित मुलीला याबाबत विचारले असता तिने संपूर्ण प्रकार कुटुंबियांना सांगितला. त्यानंतर इतरही परिचित व्यक्तींना आरोपीने त्या चित्रफिती पाठवल्याचे कुटुंबियांना समजले. अखेर त्यांनी याप्रकरणी आरोपीविरोधात पोलिसांकडे तक्रार करण्याचा निर्णय घेतला. याप्रकरणी त्यांनी पोलिसांकडे तक्रार केली. पोलिसांनी बलात्कार व पोक्सो कायद्याअंतर्गत गुन्हा दाखल करून २७ वर्षीय आरोपीला अटक केली.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुलींविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. २०२३ पोक्सो कायद्याअंतर्गत ११०८ गुन्ह्यांची नोंद झाली होती. मुंबईत २०२४ मध्ये पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे. २०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते.
२०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांची उकल होण्याच्या प्रमाणातही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घट झाली आहे. अल्पवयीन मुलांविरोधातील अत्याचाराच्या घटनांमध्ये बहुसंख्य आरोपी परिचित व्यक्ती आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
