मुंबई : मुंबई महानगर प्रदेश विकास प्राधिकरणाने (एमएमआरडीए) बांद्रा-कुर्ला संकुल (बीकेसी) येथील तीन अत्यंत महत्त्वाच्या व्यावसायिक भूखंडांच्या भाडेपट्ट्यातून सुमारे ३ हजार ८४० कोटींची कमाई केली आहे. मुख्यमंत्री देवेंद्र फडणवीस यांच्या हस्ते सोमवारी या भूखंडाचे आंतरराष्ट्रीय गुंतवणूकदारांना वाटपपत्र प्रदान करण्यात आले. ‘सुमिटोमो रिॲलिटी अँड डेव्हलपमेंट लि.’ या जपानी कंपनीला दोन भूखंडाचे आणि ‘ब्रूकफिल्ड स्ट्रॅटेजिक रिअल इस्टेट’ या कंपनीला एक भूखंडाचे वाटपपत्र प्रदान करण्यात आले. यावेळी मुख्यमंत्र्यांचे अपर मुख्य सचिव विकास खारगे, मुख्यमंत्र्यांच्या प्रधान सचिव अश्विनी भिडे, अपर मुख्य सचिव असीमकुमार गुप्ता, एमएमआरडीएचे आयुक्त डॉ. संजय मुखर्जी तसेच जपानचे शिष्टमंडळ आदी उपस्थित होते.
बीकेसी येथील सी-१३ आणि सी-१९ या दोन्ही भूखंडांसाठी ‘गोईसू रिॲलिटी प्रा. लि. ’ने (सुमिटोमो रिॲलिटी अँड डेव्हलपमेंट लि. – जपानची भारतीय उपकंपनी) सर्वोच्च बोली लावली होती. तसेच सी-८० या भूखंडास ‘स्क्लोस बंगलोर लि.’ (ब्रूकफिल्ड स्ट्रॅटेजिक रिअल इस्टेट पार्टनर्स ३ ची भारतीय उपकंपनी), अर्लीगा इको स्पेस बिझीनेस पार्क व स्क्लोस चाणक्य प्रा. लि. यांच्या संयुक्त भागीदारीने सर्वोच्च बोली लावली होती. या तीन भूखंडांच्या भाडेपट्ट्यामुळे एमएमआरडीएला एकूण ३ हजार ८४० कोटींचे उत्पन्न प्राप्त झाले असून, जवळपास १५ हजार हाय-टेक नोकऱ्यांची निर्मिती होण्याची अपेक्षा आहे.
वर्ल्ड इकॉनॉमिक फोरमच्या (डब्ल्यूईएफ) ५५व्या वार्षिक बैठकीत दरम्यान ‘एमएमआरडीए’ने सुमिटोमो व ब्रूकफिल्ड या कंपन्यांबरोबर गुंतवणुकीच्या करारांवर स्वाक्षऱ्या केल्या आहेत. ही विकासकामे एमएमआरडीएच्या ग्रोथ हब स्ट्रॅट्रेजी व नीती आयोगाच्या जी-हब उपक्रमांखालील सक्रिय गुंतवणूक प्रोत्साहनाचा भाग आहेत. मुंबई महानगर प्रदेशात २०३० पर्यंत ३०० अब्ज डॉलर अर्थव्यवस्था व ३० लाख रोजगार निर्माण करण्याचे लक्ष्य आहे. त्याचबरोबर, अत्याधुनिक पायाभूत सुविधा, भूमिगत मेट्रो, एलिवेटेड मेट्रो व बुलेट ट्रेनच्या जाळ्यामुळे बीकेसी लवकरच ‘नंबर वन’ व्यावसायिक केंद्र होईल, असा विश्वास मुख्यमंत्री फडणवीस यांनी व्यक्त केला.
