मुंबईः चुनाभट्टी येथील निर्जनस्थळी नेऊन दहा वर्षांच्या मुलावर तिघांनी त्याच्यावर अत्याचार केल्याचा गंभीर प्रकार घडला आहे. आरोपींमध्ये दोन अल्पवयीन मुलांचा सहभाग आहे. अल्पवयीन आरोपींची डोंगरी बालसुधारगृहात रवानगी करण्यात आली आहे, तर १८ वर्षीय तरूणाला याप्रकरणी अटक केली आहे. आरोपींविरोधात अपहरण व बालकांचे लैंगिक अत्याचारापासून संरक्षण (पोक्सो) कायद्यानुसार गुन्हा दाखल करण्यात आला आहे.
पीडित मुलाच्या आईच्या तक्रारीवरून पोलिसांनी भारतीय न्याय संहिता कलम १३७(२), ११५(२) व ३(५) सह पोक्सो कायदा कलम ६ व १० अंतर्गत गुन्हा दाखल करण्यात आला आहे. तक्रारीनुसार, पीडित मुलगा व आरोपी एकमेकांच्या ओळखीचे आहेत. त्यामुळे त्याला फसवून आरोपींनी चुनाभट्टी येथील निर्जनस्थळी नेले. तेथे तिघांनी अल्पवयीन मुलावर अत्याचार केला. याप्रकरणी मुलगा परत आल्यानंतर त्याच्या आईने त्याच्याकडे विचारणा केली असता घडलेला प्रकार त्याने आईला सांगितला. त्यामुळे आई घाबरली व तिने घडलेला प्रकार कुटुंबियांना सांगितला व तात्काळ स्थानिक पोलिसांकडे तक्रार केली. त्यानुसार पोलिसांनी गुन्हा दाखल केला.
त्यानंतर पोलीस पथक पाठवून १८ वर्षीय आरोपीला अटक करण्यात आली. तर उर्वरीत दोन आरोपी १३ व १६ वर्षांचे आहेत. त्यांची रवानगी डोंगरी बालसुधारगृहात करण्यात आली आहे. पीडित मुलगा व आरोपी एकमेकांचे परिचित आहेत. तक्रारीवरून याप्रकरणी गुन्हा दाखल करण्यात आला असून शनिवारी दोन विधीसंघर्षग्रस्त बालकांची रवानगी डोंगरी बालसुधारगृहात करण्यात आहे. याप्रकरणी अधिक तपास सुरू असल्याचे अधिकाऱ्याने सांगितले.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ पोक्सो कायद्या अंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्या अंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.
२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याच्या प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घडनांमध्ये बहुसंख्य आरोपी परिचीत व्यक्त आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होत.
