मुंबई : चेंबूर – जेकब सर्कल मोनोरेल मार्गिकेला अपेक्षित प्रवासी संख्या मिळत नसली तरी मोनोरेल मार्गिकेवरून दैनंदिन प्रवास करणाऱ्या प्रवाशांसाठी पाच-दहा मिनिटांनी मोनोरेल गाडी सोडणे गरजेचे आहे. मात्र मोनोरेलच्या ताफ्यात कमी गाड्या असून दररोज या मार्गिकेवरून केवळ पाचच गाड्या धावतात. त्यातही मंगळवारच्या घटनेमुळे एका गाडीची मोठी हानी झाली असून ही गाडी सध्या दुरुस्तीसाठी पाठविण्यात आल्याने गुरुवारी चारच गाड्या धावत होत्या. त्यामुळे दोन गाड्यांमधील वारंवारीता वाढविण्यात आली होती. गाड्या कमी असल्याने प्रवाशांमध्ये नाराजी असून स्वदेशी बनावटीच्या १० नवीन मोनोरेल गाड्या सेवेत दाखल होण्याची प्रवाशांना प्रतीक्षाच आहे. या गाड्या लवकरात लवकर नवीन गाड्या सेवेत दाखल करण्याची मागणी प्रवाशांकडून करण्यात येत आहे.
मुंबई महानगर प्रदेश विकास प्राधिकरणाने (एमएमआरडीए) २० किमी लांबीच्या चेंबूर – जेकब सर्कल मोनोरेल मार्गिकेची दोन टप्प्यात उभारणी करून हे टप्पे वाहतूक सेवेत दाखल केले. मोनोरेल २०१४ पासून सेवेत दाखल असून या मार्गिकेला प्रवाशांचा म्हणावा तसा प्रतिसाद मिळालेला नाही. अशात मोनोरेल मार्गिकेवर धावणाऱ्या गाड्यांची संख्या कमी असल्याने, १५ ते ३० मिनिटांनी गाड्या धावत असल्याने प्रवासी मोनोरेलकडे पाठ फिरवत आहेत. २० किमी लांबीच्या मोनोरेल मार्गिेकसाठी केवळ सहा गाड्या एमएमआरडीएकडे आहेत. यातील एक गाडी राखीव ठेवण्यात येते. दररोज मार्गिकेवर पाच गाड्या धावतात.
गाड्यांची संख्या कमी असल्याने १५ ते ३० मिनिटांच्या कालावधीने गाडी सोडली जाते. त्यातच सध्या सेवेत दाखल असलेल्या गाड्या जुन्या आहेत. त्यामुळे एमएमआरडीएने स्वदेशी बनावटीच्या नवीन १० गाड्या खरेदी करून त्या सेवेत दाखल करण्याचा निर्णय घेतला. त्यानुसार १० मोनोरेल गाड्यांच्या बांधणीचे कंत्राट मेधा सर्वो ड्राईव्हज प्रायव्हेट लिमिटेड या कंपनीला देण्यात आले आहे. ५९० कोटी खर्च करून या १० गाड्या खरेदी केल्या जाणार आहेत. त्यानुसार सात नवीन गाड्या तयार होऊन मुंबईत दाखल झाल्या आहेत. या गाड्यांची चाचणी मागील काही दिवसांपासून सुरू आहे. या गाड्या सेवेत का दाखल केल्या जात नाहीत, असा प्रश्न प्रवाशांकडून विचारला जात आहे.
दरम्यान, सात नवीन गाड्या मुंबईत दाखल झाल्या आहेत. त्यांची चाचणी सुरू आहे. चाचणी यशस्वी होऊन पुढील कार्यवाही झाल्यानंतर या गाड्या सेवेत दाखल केल्या जातील असे एमएमआरडीएच्या वरिष्ठ अधिकाऱ्यांनी सांगितले. उर्वरित तीन नवीन गाड्याही लवकरच मुंबईत येणार असल्याचेही त्यांनी सांगितले. पण या १० नवीन गाड्या सेवेत दाखल होण्यासाठी प्रवाशांना डिसेंबरपर्यंत वाट पाहावी लागण्याची शक्यता आहे.
