Monorail: मुंबईतल्या वडाळा ते भक्ती पार्क या मार्गावर प्रवासी मोनो रेलमध्ये अडकून पडल्याची घटना समोर आली. सुमारे दोन तास मोनो रेलमध्ये प्रवासी अडकून पडले होते. त्या ठिकाणी अग्निशमन दल, क्रेन हे सगळं बोलवण्यात आलं आणि मोनो रेलची काच फोडून प्रवाशांची सुखरूप सुटका करण्यात आली. भक्ती पार्कच्या मैसूर कॉलनी या ठिकाणी ही घटना घडली. दरम्यान या मोनो रेलमधल्या सर्व ५८२ प्रवाशांची सुखरुप सुटका करण्यात आली आहे. अग्निशमन दलाच्या अधिकाऱ्यांनी ही माहिती दिली.
अग्निशमन दलाच्या अधिकाऱ्यांनी काय सांगितलं?
संध्याकाळी ६ ते ६.३० च्या सुमारास आम्हाला मोनोरेल एका जागेवरच थांबल्याची माहिती मिळाली. त्यामध्ये लोक अडकून पडल्याचं कळलं. ज्यानंतर आम्ही तातडीने या ठिकाणी आलो आणि बचावकार्य सुरु केलं. आम्ही मोनोरेलच्या डब्यांमध्ये अडकलेल्या ५८२ प्रवाशांची सुटका केली आहे. सगळ्यांना सुखरुप खाली उतरवलं आहे. या घटनेतील सर्व प्रवासी सुरक्षित आहे. कुठलीही जीवितहानी झालेली नाही. काही जणांना श्वास घेण्यासाठी त्रास होत होता. त्या सगळ्यांना आम्ही रुग्णालयात उपचारांसाठी नेलं होतं. अनेक लोक घाबरुन गेले होते. त्यामुळे त्यांना श्वास कोंडल्यासारखं वाटत होतं. पण साडेतीन तासात आम्ही सगळ्या प्रवाशांना सुखरुप खाली उतरवलं आहे. असं अग्निशमन दाचे अधिकारी रविंद्र अंबुलगेकर यांनी सांगितलं.
अतिरिक्त पोलीस उपायुक्त महेश पाटील यांनी काय सांगितलं?
मोनो रेलमध्ये अडकलेल्या प्रवाशांना आम्ही अग्निशमन दलाच्या मदतीने सोडवलं आहे. आम्हाला ६.३० च्या दरम्यान फोन आला होता. त्यानंतर आम्ही सगळे म्हणजेच पोलीस, अग्निशमन दल आणि महापालिकेचे कर्मचारी या ठिकाणी पोहचलो आणि आम्ही बचावकार्य राबवलं. ५८२ लोक या मोनोरेलमध्ये अडकले होते त्यांना सोडवण्यात आलं आहे. अग्निशमन दल, मुंबई महापालिका आणि पोलीस यांनी हे बचावकार्य संपवलं आहे.
मुख्यमंत्री देवेंद्र फडणवीस यांची पोस्ट काय?
काही तांत्रिक कारणाने चेंबूर आणि भक्तीपार्क दरम्यान एक मोनोरेल अडकून पडली आहे. एमएमआरडीए, अग्निशमन दल आणि महापालिका अशा सर्वच यंत्रणा त्याठिकाणी पोहोचल्या आहेत. सर्व प्रवाशांच्या सुरक्षिततेला सर्वोच्च प्राधान्य देण्यात येत आहे. त्यामुळे कुणीही काळजी करु नये, घाबरून जाऊ नये. सर्व प्रवाशांना सुखरुप बाहेर काढण्यात येईल. सर्वांनी संयम ठेवावा, ही माझी सर्वांना विनंती आहे. मी एमएमआरडीए आयुक्त, महापालिका आयुक्त, पोलिस आणि सर्वच यंत्रणांशी संपर्कात आहे. हा प्रकार का घडला, याचीही चौकशी करण्यात येईल.
मुंबई महापालिकेच्या अधिकाऱ्यांसह वैद्यकीय पथकही घटनास्थळी दाखल होतं
घटनास्थळी मुंबई महानगरपालिकेच्या अधिकाऱ्यासह वैद्यकीय पथक देखील दाखल झालं होतं. तसेच जवळच्या महानगरपालिका रुग्णालयालाही सज्ज राहण्याचे निर्देश देण्यात आल्याचं सांगितलं जात आहे. दरम्यान, तांत्रिक बिघाडामुळे ही मोनोरेल बंद पडल्याची प्राथमिक माहिती समोर आली होती.
