दवाखान्यांमध्ये आधुनिक पद्धतीची आरोग्य सेवा…रुग्णांना मोबाइलवरच मिळणार उपचारांच्या नोंदी…

अधिकारी, कर्मचाऱ्यांना प्रशिक्षण

महानगरपालिका आयुक्त आणि प्रशासक भूषण गगराणी यांच्या मार्गदर्शनाखाली एचएमआयएस – २ प्रणालीची प्रभावीपणे अंमलबजावणी केली जाणार आहे. यासाठी सर्व दवाखान्यांना आवश्यक संगणक, इंटरनेट सुविधा व संबंधित यंत्रासामुग्री देण्यात आली आहे. तसेच सर्व संबंधित अधिकारी व कर्मचाऱ्यांना सविस्तर प्रशिक्षण देण्यात आले आहे. यापूर्वी रुग्णांच्या नोंदी कागदावर (पेपर) केल्या जात होत्या. मागील सहा महीने एचएमआयएस – २ प्रणाली प्रायोगिक स्वरूपात राबविण्यात आली आहे. येत्या २ मेपासून ही प्रणाली १७७ दवाखान्यात कार्यान्वित केली जात आहे. तसेच, २१७ हिंदुहृदयसम्राट बाळासाहेब ठाकरे आपला दवाखाना येथेही ३० मेपर्यंत ही प्रणाली कार्यान्वित करण्याचे नियोजन पालिकेने केले आहे.

उपचाराचा आढावा घेता येणार

महानगरपालिका एचएमआयएस – २ प्रणाली ही आयुष्मान भारत डिजीटल मिशनला (एबीडीएम) अनुरूप आहे. यामध्ये रुग्णाला एक विशिष्ट ओळखपत्र क्रमांक (आयडी) देण्यात येईल. या ओळखपत्राच्या आधारे रुग्णांना दवाखान्यातून रुग्णालयात तसेच रुग्णालयातून दवाखान्यात पाठवता येऊ शकते. त्यांच्या उपचार पद्धतीचा आढावा (ट्रॅक) घेता येतो. रुग्णांना त्यांच्या मोबाइलवर उपचारांच्या सर्व नोंदी एकाच ठिकाणी मिळू शकतील. एचएमआयएस – २ प्रणालीच्या माध्यमातून रुग्णांची नोंदणी वैद्यकीय अधिकाऱ्यांकडून तपासणी आणि औषध वितरण इत्यादी नोंदी डिजीटल स्वरूपात उपलब्ध होणार आहेत. तसेच औषध साठा व्यवस्थापन, रुग्णसेवा अहवाल, सांख्यिकीय विश्लेषण आणि धोरणात्मक निर्णय प्रक्रियेसाठीही ही प्रणाली उपयुक्त ठरणार आहे. पुढील टप्प्यात एचएमआयएस – २ ही प्रणाली प्रसुतीगृहे, उपनगरीय रुग्णालये, वैद्यकीय महाविद्यालयांतही राबविण्यात येणार आहे.

एक सकारात्मक पाऊल…

या पर्यावरणपूरक प्रणाली तंत्रज्ञानाचा वापर करून सार्वजनिक आरोग्य व्यवस्थेला अधिक सक्षम व उत्तरदायित्वपूर्ण बनवण्यात येत आहे. रुग्ण सेवांचे डिजीटल रूपांतर घडवून नागरिकांना दर्जेदार व सुलभ सेवा देण्याच्या दिशेने हे एक सकारात्मक पाऊल आहे. नागरिकांनी या सुविधेचा जास्तीत जास्त लाभ घ्यावा, असे आवाहन महानगरपालिका प्रशासनाकडून करण्यात आले आहे.