मुंबईः माजी मंत्री बाबा सिद्दीकी यांच्या हत्येनंतर त्यांचा मुलगा, माजी आमदार झिशान सिद्दीकी यांना धमकीचा ई-मेल पाठवणाऱ्याला मुंबई पोलिसांच्या गुन्हे शाखेने अटक केली आहे. मोहम्मद दिलशाद नावेद याला त्रिनिदाद अँड टोबॅगो येथून मुंबई विमानतळावर दाखल होताच अटक करण्यात आल्याची माहिती सूत्रांनी दिली. त्याच्याविरोधात लुक आऊट सर्क्युलर जारी करण्यात आले होते. पोलिसांनी या प्रकरणी तक्रार प्राप्त झाल्यानंतर गुन्हा दाखल केला. माजी आमदार झिशान सिद्दीकी यांना यापूर्वीही ऑक्टोबर महिन्यात धमकीसाठी दूरध्वनी आला होता.
झिशान सिद्दीकी यांच्या ई-मेल आयडीवर २१ एप्रिलला धमकीचा ई-मेल आला होता. दोन दिवसांत त्यांना अनेक ई-मेल पाठवण्यात आले होते. त्यात ई-मेल पाठवणाऱ्या व्यक्तीने १० कोटी रुपयांच्या खंडणीचा, तसेच दाऊद टोळीच्या नावाचा उल्लेख केला होता. त्यामुळे आरोपीचा कोणत्या गुन्हेगारी टोळीशी संबंध आहे का, याबाबत पोलीस अधिक तपास करीत आहेत. त्यावेळी पहिल्या ई-मेलनंतर सहा तासांनी दुसरा धमकीचा ई-मेल आला. या प्रकरणी झिशान सिद्दीकी यांनी वांद्रे पोलिसांकडे तक्रार केली असून त्यानंतर वांद्रे पोलिसांनी झिशान सिद्दीकी यांच्या घरी येऊन त्यांचा जबाब नोंदवला.
या तक्रारीवरून पोलिसांनी तपासाला सुरूवात केली होती. सिद्दीकी यांना धमकी पाठवणाऱ्या नावेदचा कोणत्या गुन्हेगारी टोळीशी संबंध आहे का, याबाबत पोलीस तपास करीत आहेत. यापूर्वीही बाबा सिद्दीकी यांच्या हत्येनंतर झिशान यांना दोन वेळा धमकी देण्यात आली होती. बाबा सिद्दीकी यांच्या हत्येनंतर ऑक्टोबर महिन्यात झिशान व अभिनेता सलमान खान यांना धमकी देण्यात आली होती. आमदार झिशान सिद्दीकी यांच्या कार्यालयात याबाबत दूरध्वनी आला होता. निर्मल नगर पोलिसांनी याप्रकरणी गुन्हा दाखल केला होता. गुन्हे शाखाही याप्रकरणी तपासणी करीत आहे.
बाबा सिद्दिकी यांची गोळ्या झाडून हत्या करण्यात आली होती. त्यांच्या पक्ष कार्यालयाबाहेरच लॉरेन्स बिश्नोई टोळीच्या गुंडांनी त्यांच्यावर गोळ्या झाडल्या होत्या. त्यानंतर, झिशान सिद्दीकी यांच्या सुरक्षेत वाढ करण्यात आली. सिद्दीकी यांची हत्या झालेल्या कार्यालयात धमकीचा दूरध्वनी आला होता. तसेच त्यांना ई-मेलद्वारेही धमकी देण्यात आली होती. या दोन्ही प्रकरणाबाबत आता पोलीस अधिक तपास करीत आहेत. आरोपीच्या चौकशीतून याबाबत अधिक माहिती मिळू शकेल.
