मुंबई : भर वर्गात शिक्षकाने १२ वर्षांच्या विद्यार्थिनीचा विनयभंग केल्याचा गंभीर प्रकार घडला. याप्रकरणी मुलीच्या तक्रारीवरून ४० वर्षीय शिक्षकाविरोधात विनयभंग व बालकांचे लैंगिक अत्याचारापासून संरक्षण (पोक्सो) कायद्याअंतर्गत गुन्हा दाखल करण्यात आला आहे. आरोपी शिक्षकाने यापूर्वीही दोन वेळा पीडित विनयभंग केल्याचे पीडित मुलीने तक्रारीत म्हटले आहे. याप्रकरणी समता नगर पोलीस अधिक तपास करीत आहेत.
पीडित मुलगी इयत्ता सहावीत शिक्षण घेत आहे. पीडित मुलगी तिच्या मैत्रिणीसोबत बोलत असताना आरोपीने तिचा हात पकडण्याच्या बहाण्याने तिला अश्लीर स्पर्श केला. तसेच दोन फटके मारण्याच्या बहाण्यानेही पुन्हा अश्लील स्पर्श केला. शिक्षक शिकवत असल्यामुळे पीडित मुलीला हा प्रकार समजला नाही. पण त्यानंतर तिने याबाबत शिक्षकाकडे विचारणा केली असता त्याने पीडित मुलीच्या हातावर लाकडी पट्टीने फटके मारले. तसेच गालावर दोन चापट्या मारल्या.
यापूर्वीही शिक्षकाने मुलीला दोन वेळा अशाच प्रकारे स्पर्श केला होता. त्यामुळे अखेर तिने हा प्रकार घरी गेल्यावर कुटुंबियांना सांगितला. त्यांनी याप्रकरणी पोलिसांकडे तक्रार करण्याचा निर्णय घेतला. त्यानुसार पीडित मुलीला सोबत घेऊन पालकांनी पोलिसांकडे तक्रार केली. प्रकरणाचे गांभीर्य लक्षात घेऊन पोलिसांनी तात्काळ भारतीय न्याय संहिता कलम ७४ (वियभंग) व पोक्सो कायदा कलम ८ व १२ अंतर्गत गुन्हा दाखल केला. याप्रकरणी समता नगर पोलीस अधिक तपास करीत आहेत.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १,३४१ गुन्ह्यांची नोंद झाली होती. २०२३ पोक्सो कायद्याअंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.
२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांची उकल होण्याच्या प्रमाणातही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घडनांमध्ये बहुसंख्य आरोपी परिचित होते. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
