नेटफ्लिक्सला भारतातून १६ हजार कोटींचा फायदा; टेड सारंडोस यांच्याकडून मनोरंजन विश्वातील बदलांचा वेध

‘वेव्हज’ परिषदेच्या तिसऱ्या दिवशी शनिवारी अभिनेता सैफ अली खान याने टेड सारंडोस यांच्याशी संवाद साधला. त्यावेळी नेटफ्लिक्सने भारतात केलेल्या गुंतवणुकीचा कसा फायदा झाला याविषयी विवेचन केले. नेटफ्लिक्सच्या फायद्यातून भारतीय निर्मितीसंस्थांसाठी जवळपास २० हजार कलाकार – तंत्रज्ञांसाठी रोजगार उपलब्ध झाला, अशी माहिती त्यांनी दिली. आत्तापर्यंत देशातील जवळपास ९० शहरांमधून नेटफ्लिक्सने वेबमालिकांचे चित्रीकरण केले असून १५० भारतीय वेबमालिका आणि वेबपटांची निर्मिती केली आहे.

गेल्या वर्षी नेटफ्लिक्सवर जगभरातील लोकांकडून ३ अब्ज तास भारतीय आशय पाहिला गेला. शिवाय, दर आठवड्याला प्रदर्शित होणाऱ्या पहिल्या दहा सर्वोत्तम वेबमालिका वा वेबपटांच्या यादीत एक भारतीय मालिका हमखास असायचीच, असेही त्यांनी सांगितले.

स्थानिक संस्कृतीचे प्रतिबिंब कथानिर्मितीत गरजेचे

कुठल्याही माध्यमासाठी भारतीय चित्रपटकर्मींनी त्यांच्या मातीतल्या कथानिर्मितीवर अधिक भर द्यायला हवा. भारतीय कथा असलेला आशयच जगभर अधिक लोकप्रिय होतो आहे, हेही सारंडोस यांनी अधोरेखित केले.