बीड बँक घोटाळ्यावरून गदारोळ

बीड जिल्हा मध्यवर्ती बँक घोटाळ्यातील आरोपींची नावे जाहीर करावी, अशी मागणी करीत सत्ताधारी भाजपच्या सदस्यांनी बुधवारी विधानसभेत आक्रमक भूमिका घेतल्याने गोंधळ झाला. या घोटाळ्यात विरोधी पक्षनेते धनंजय मुंडे यांचे नाव घेतले जावे, असा भाजपच्या सदस्यांचा प्रयत्न होता.
बीड जिल्हा बँकेतील घोटाळ्यात ८९ जणांच्या विरोधात गुन्हे दाखल झाले आहेत. त्यात धनंजय मुंडे व त्यांचे वडील पंडितअण्णा मुंडे यांचाही समावेश आहे. या घोटाळ्यात कोणकोण गुंतले आहे याची नावे वाचून दाखवावी, अशी मागणी भाजपच्या सदस्यांनी सहकार राज्यमंत्री दादा भुसे यांच्याकडे केली. भुसे यांनी नावे पटलावर ठेवण्याची तयारी दर्शविली. पण नावे वाचून दाखवा, अशी भाजप सदस्यांची मागणी होती. भुसे यांनी नावे वाचण्यास सुरुवात करताच काही सदस्यांनी विरोध केला. या गोंधळात लक्षवेधी राखून ठेवण्यात आली.