लोकसत्ता विशेष प्रतिनिधी
मुंबई: राज्यातील मंत्री आणि वरिष्ठ अधिकाऱ्यांच्या ‘हनी ट्रॅप’ मुद्द्यावरून आक्रमक भूमिका घेत विरोधकांनी गुरुवारी विधानसभेचे कामकाज रोखण्याचा प्रयत्न केला. मुंबई, ठाणे आणि नाशिक हे याचे केंद्र असून याबाबतचा ‘पेनड्राइव्ह’ सार्वजनिक करण्याचा इशारा देत सरकारने खुलासा करण्याची मागणी काँग्रेसच्या नाना पटोले यांनी केली. त्यानंतर अधिवेशन संपण्यापूर्वी निवेदन करण्याचे आदेश विधानसभा अध्यक्ष राहुल नार्वेकर यांनी दिले.
गेल्या काही दिवसांपासून मोठ्या प्रमाणावर चर्चेत असलेल्या हनी ट्रॅप प्रकरणाचे पडसाद सलग दुसऱ्या दिवशी विधिमंडळात उमटले. हनी ट्रॅपचा मुद्दा उपस्थित करीत चौकशीची विरोधकांनी मागणी केली. नाना पटोले यांनी हनी ट्रॅपबाबत अनेक पुराव्यांचा पेनड्राइव्ह आपल्याकडे असल्याचा दावा करून सरकारने उत्तर द्यावे, अशी मागणी केली. काही मंत्री आणि वरिष्ठ सनदी अधिकारी अडकले आहेत. आपल्याला कोणाची बदनामी करायची नाही. चारित्र्यहनन करायचे नाही. पण सरकार प्रकरण लपवत आहे, असा आरोप पटोले यांनी केला.
गोपनीय दस्तऐवज?
●‘हनी ट्रॅप’मध्ये काही वरिष्ठ अधिकारी अडकले असल्याचा आरोप नाना पटोले यांनी केला. काही लोकांना महत्त्वाचे दस्तऐवज यातून मिळत असल्याचे ते म्हणाले.
●यात मंत्री, वरिष्ठ अधिकाऱ्यांचा समावेश असल्याची चर्चा रंगली असतानाच पटोले यांनी सभागृहात चर्चेची तसेच चौकशीची मागणी बुधवारीही केली होती.
‘हनी ट्रॅप’च्या माध्यमातून गोपनीय कागद समाजविघातक संघटनांकडे गेले तर राज्यासह संपूर्ण व्यवस्थेचे मोठ्या प्रमाणात नुकसान होण्याचा धोका आहे.– नाना पटोले, काँग्रेस नेते
