मुंबई : दीपोत्सव साजरा करताना मुंबईकरांनी अवतीभवतीच्या पर्यावरणाचाही सजगपणे विचार करावा. तसेच दिवाळीत फटावे फोडताना लहान मुलांची काळजी घ्यावी. झाडे, अतिउच्च दाबाच्या विद्युत तारा, वायुवाहिनीजवळ फटाके फोडणे टाळावे. यासोबतच फटाक्यांमुळे ध्वनी व वायू प्रदूषण होणार नाही, याबाबत नागरिकांनी दक्ष रहावे, असे आवाहन महापालिका प्रशासनासह अग्निशमन दलाने केले आहे. दुर्दैवाने आग किंवा तत्सम प्रसंग उद््भवल्यास तात्काळ १०१ किंवा नागरी मदत सेवा संपर्क क्रमांक १९१६ वर संपर्क साधावा, असे अग्निशमन दलाकडून करण्यात आले आहे.
दिवाळीदरम्यान दरवर्षी आगीच्या घटना घडतात. त्यामुळे महानगरपालिका व अग्निशमन दलातर्फे नागरिकांना वेळोवेळी सण योग्यरित्या साजरा करण्याबाबत मार्गदर्शन केले जाते. यंदाही उत्सवादरम्यान फटाके फोडताना सावधगिरी बाळगण्याचे आवाहन पालिकेतर्फे करण्यात आले आहे. इमारत व जिन्यावर, तसेच टेरेसवर फटाके फोडू नयेत. फटाके पेटवण्यासाठी आगकाडी किंवा लायटरचा वापर टाळावा.
झाडे, ओव्हरहेड विद्युत तारा किंवा उंच इमारतीजवळ हवेत उडणारे फटाके फोडू नयेत. खिडक्यांच्या पडद्याजवळ पणत्या / दिवे लावू नयेत. विजेच्या तारा, गॅस पाईपलाईन किंवा वाहनांजवळ, वाहनतळाच्या ठिकाणी फटाके फोडू नयेत. घर, इमारत, परिसर इत्यादी ठिकाणी विद्युत रोशणाई करताना अधिकृत विद्युत तंत्रज्ञांची मदत घ्यावी. तसेच निर्धारित क्षमतेपेक्षा अधिक क्षमतेचे विद्युत भार (ओव्हरलोड) होणार नाही, याची काळजी घ्यावी, आदी सूचना पालिकेतर्फे करण्यात आल्या आहेत.
दरम्यान, दिवे लावताना व फटाके फोडताना सुरक्षिततेला सर्वोच्च प्राधान्य द्यावे, लहान मुलांची विशेष काळजी घ्यावी, असे आवाहन महानगरपालिका प्रशासनातर्फे करण्यात आले आहे.
फटाके फोडताना/ उडविताना घ्यावयाची काळजी
– सुती कपडे परिधान करावेत.
– फटाके मुलांपासून लांब ठेवावेत. मुले फटाके फोडतांना मोठ्यांनी सोबत रहावे.
– फटाके फोडताना नेहमी पादत्राणे वापरावीत.
– फटाके फोडताना / उडवताना पाण्याने भरलेली बादली जवळ ठेवावी व कोणाला भाजल्यास तात्काळ त्या ठिकाणी भरपूर स्वच्छ पाणी ओतावे.
– फटाके फोडण्यासाठी अगरबत्ती व फुलबाजीचा वापर करावा.
