ज्येष्ठांच्या बस सवलतीला नकार

तिकीट दर कमी झाल्याचे कारण देत ज्येष्ठ नागरिकांना सवलतीच्या दरात बस प्रवास देण्याचा मुंबई पालिका प्रशासनाचा प्रस्ताव मान्य करण्यास बेस्ट प्रशासनाने नकार दिला आहे. परिणामी ज्येष्ठ नागरिकांना सवलतीच्या बस प्रवासापासून वंचित राहावे लागणार आहे.

पालिकेच्या नियोजन विभागाने बेस्ट प्रशासनाला ज्येष्ठ नागरिकांना अध्र्या किमतीत प्रवास दिला जावा, असा प्रस्ताव दिला होता. यासाठी पालिकेच्या नियोजन विभागाकडून निधी मंजूर केला जाणार होता. ज्येष्ठ नागरिकांना सवलतीच्या दरात बस प्रवास देण्यासाठी पालिका प्रशासनाने हा प्रस्ताव तयार केला होता. तो अभिप्रायासाठी बेस्ट प्रशासनाकडे दिला होता. मात्र बेस्ट प्रशासनाने जुलै महिन्यापासून प्रवास भाडे कमी झाल्याचे कारण पुढे करत हा प्रस्ताव नाकारला आहे. त्याबाबतचे पत्र बेस्टने पालिकेला दिले आहे.

ज्येष्ठांसाठी बेस्ट बसमधून सवलतीच्या प्रवासासाठी पालिकेकडून निधी उपलब्ध केला जाणार होता. त्याचा कोणताही आर्थिक भार बेस्टवर येणार नव्हता. तरीही हा प्रस्ताव नाकारला गेल्याने ज्येष्ठ नागरिकांच्या संघटनांनी नाराजी व्यक्त केली आहे. ज्येष्ठ नागरिकांकडून अनेक महिन्यांपासून सवलतीच्या दरात बस प्रवास देण्याची मागणी केली होती. मात्र या मागणीकडे दुर्लक्ष करण्यात आले. दुसरीकडे रेल्वे प्रवास, एसटी महामंडळ, एनएमएमटी आदींकडून ज्येष्ठांना प्रवास भाडय़ात सवलत दिली जाते. त्या धर्तीवर बेस्टनेही ज्येष्ठांना सवलतीच्या दरातील प्रवास द्यावा, अशी मागणी करण्यात येत आहे.

‘बहुतांश ज्येष्ठ नागरिकांना वयाच्या साठीनंतर उत्पन्नाचे कोणतेही साधन नाही. गरीब ज्येष्ठ नागरिकांना बेस्टचे तिकीट परवडत नाही. आम्ही बेस्टकडे बस तिकीट कमी करावे अशी मागणी अनेकदा केली होती. त्यांनी दर कमी करण्याचे आश्वासन दिले होते. बेस्टने पाच रुपयांच्या तिकिटामध्ये सवलत दिली नाही तरी चालेल. मात्र १० रुपये आणि त्यापुढील तिकिटांमध्ये सवलत द्यावी,’ अशी मागणी महाराष्ट्र ज्येष्ठ नागरिक महासंघ (फेस्कॉम)चे अध्यक्ष विजय औंधे यांनी केली आहे.