“कुछ मिला क्या?”; निकटवर्तीयांवरील ईडीच्या कारवाईनंतर संजय राऊत यांचा सवाल

“या सरकारमध्ये विरोधकांचे नातेवाईक यांच्यावर कारवाई होत असतात आणि आमच्या सारखे लोक नेहमी सहन करत असतात. २०२४ पर्यंत आम्ही हे सहन करु. राजकीय सुड बुद्धीच्या या कारवाया होत आहेत. त्यांचा तपास आमच्याभोवती सुरु आहे. मी त्यांना विचारतो कुछ मिला क्या. हा एक खेळ सुरु आहे,”अशी प्रतिक्रिया संजय राऊत यांनी दिली.

गुरु आशिष कन्स्ट्रक्शन प्रायव्हेट लिमिटेडचे ​​माजी संचालक प्रवीण राऊत यांना पुनर्विकास प्रकल्पाच्या नावाखाली १०४० कोटी रुपयांच्या म्हाडाच्या जमीन घोटाळ्यात अटक करण्यात आली आहे. न्यायालयाने राऊतला आठ दिवसांची ईडी कोठडी सुनावली. ईडीने सांगितले की, राऊत यांना मनी लॉन्ड्रिंग प्रतिबंधक कायद्यांतर्गत (पीएमएलए) अटक करण्यात आली आहे.

पंजाब अँड महाराष्ट्र को-ऑपरेटिव्ह (पीएमसी) बँकेतील ४,३०० कोटी रुपयांच्या कथित फसवणुकीप्रकरणी एचडीआयएल ईडीसह इतर काहींची ईडी चौकशी करत आहे. पीटीआय या वृत्तसंस्थेने दिलेल्या वृत्तानुसार,  ईडीच्या मुंबई कार्यालयात चौकशीनंतर प्रवीण राऊतला अटक करण्यात आली. मंगळवारी ईडीने महाराष्ट्रातील राऊत यांच्या काही ठिकाणांवर छापे टाकले होते.

गुरु आशिष कन्स्ट्रक्शनला महाराष्ट्र गृहनिर्माण आणि क्षेत्र विकास प्राधिकरणाने (म्हाडा) उपनगरीय मुंबईतील चाळीचा पुनर्विकास करण्याचे कंत्राट दिल्याचे ईडीच्या तपासात उघड झाले आहे. त्यात या प्रकल्पाच्या एफएसआयच्या विक्रीत अनियमितता आढळून आली. एजन्सीने गेल्या वर्षी पीएमसी बँक मनी लॉन्ड्रिंग प्रकरणात प्रवीण राऊत यांची ७२ कोटी रुपयांची मालमत्ता जप्त केली होती.