रहस्य, हास्य आणि भावबंधांचा मेळ साधणारा ‘स्मार्ट सूनबाई’ २१ नोव्हेंबरपासून प्रदर्शित होणार

कथेत काहीतरी विलक्षण आणि गूढ दडलेले आहे हे ‘स्मार्ट सूनबाई’ चित्रपटाच्या फलकावरून स्पष्ट होते. या चित्रपटाच्या फलकावरील काही कलाकार शहरी, तर काही कलाकार ग्रामीण लुकमध्ये दिसत आहेत. तसेच ही ‘स्मार्ट सूनबाई’ नक्की कोण? आणि तिच्या आयुष्यात नेमके काय घडणार ? असे नानाविध प्रश्न प्रेक्षकांच्या मनात निर्माण झाले आहेत.

या चित्रपटात रोहन पाटील, संतोष जुवेकर, भाऊ कदम, मोहन जोशी, दीपक शिर्के, अंशुमन विचारे, विनम्र बाबल, सायली देवधर, प्राजक्ता गायकवाड, प्राजक्ता हनमघर, स्नेहल शिदम, किशोरी शहाणे, उषा नाईक, भक्ती चव्हाण, दीप्ती सोनवणे, अनुष्का बेनके, पूजा राजपूत, सुचिका जोशी, विद्या मेहेत्रे, आर्या सकुंडे , वैशाली चौधरी, सपना पवार , कांचन चौधरी यांसारखे दिग्गज आणि लोकप्रिय कलाकार झळकणार आहेत. या सर्व कलाकारांची जमून आलेली उत्तम भट्टी चित्रपटाची जमेची बाजू ठरणार आहे. तर प्रत्येक सूनेला ‘स्मार्ट सूनबाई’ होण्यासाठी हा चित्रपट नक्कीच प्रेरणादायी ठरेल, असे दिग्दर्शक शिवाजी दोलताडे यांनी सांगितले.

चित्रपटाची कथा आणि लेखन योगेश शिरसाट यांनी केले आहे. गीतकार वैभव देशमुख, अदिती द्रविड असून अजय गोगावले, वैशाली माढे, आनंदी जोशी, सावनी रवींद्र, उर्मिला धनगर यांचे स्वर गाण्यांना लाभले आहेत. तर ही गीते विजय नारायण गवंडे, साई – पियुष यांनी संगीतबद्ध केली आहे. प्रेक्षकांच्या मनात उत्सुकतेची लाट निर्माण करणारा हा नवीन चित्रपट लवकरच रूपेरी पडद्यावर झळकणार आहे.