मुंबई-नाशिक महामार्गावरील खारेगाव परिसरात बुधवारी पहाटे कारने टँकरला धडक दिल्याने झालेल्या अपघातात कारमधील तिघांचा जागीच मृत्यू तर एक जण गंभीर जखमी झाला आहे. या प्रकरणी नारपोली पोलिसांनी टँकरचालक मोहम्मद सलमान हमीदअली कुरेशी (२७, रा. चेंबूर) याला ताब्यात घेतले आहे.
विकी पिन्टो अमरोज (३४), कबीर अरोरा (२५) आणि अनुज दिघे (३२) अशी  मृत पावलेल्या तिघांची तर अजित परब (४०), असे जखमीचे नाव आहे. हे सर्वजण ठाणे परिसरातील रहिवासी असून कॉलसेंटरमध्ये कामाला होते. हे चौघेजण  एका कारमधून ठाण्याच्या दिशेने येत होते. खारेगाव टोलनाकापासून काही अंतरावर असलेल्या पुलाजवळ ठाण्याच्या दिशेने येणाऱ्या टँकरला त्यांच्या कारची पाठीमागून जोरदार धडक बसली.