मुंबई : एका बाजूला आजपासून भाद्रपदातील गणेशोत्सवाची तयारी सुरु असताना मुंबईतील कांदिवलीमधील चारकोप परिसरातील दोन गणेशमूर्तींचे शनिवारी विसर्जन होणार आहे.प्लास्टर ऑफ पॅरिसच्या उंच मूर्तींचे नैसर्गिक जलस्रोतात विसर्जन करण्यास उच्च न्यायालयाने परवानगी दिल्यामुळे पश्चिम उपनगरातील माघी गणेशोत्सवातील दोन मूर्तींच्या विसर्जनाचा मार्ग मोकळा झाला आहे. गेल्या सहा महिन्यांपासून रखडलेले विसर्जन अखेर आज २ ऑगस्टला एकत्रित होणार आहे. भाद्रपदातील गणेशोत्सव मंडळाची उत्सवाची तयारी सुरू असून काही मोठ्या मंडळाच्या मूर्तीचे आगमन आजपासून होणार आहे. तर या दोन मूर्ती मात्र विसर्जनासाठी निघणार आहेत.
माघी गणेशोत्सवाला तब्बल सहा महिने झाले तरी पश्चिम उपनगरातील दोन मंडळांच्या गणेशमूर्तींचे अद्याप विसर्जन झालेले नाही. डहाणूकरवाडी येथील कांदिवलीचा श्री आणि कांदिवलीतील चारकोपचा राजा या दोन मंडळांच्या पीओपीच्या गणेशमूर्तींचे अद्याप विसर्जन झालेले नाही. या दोन मंडळांनी कृत्रिम तलावात विसर्जन करण्यास नकार दिला होता. त्यामुळे या गणपतींचे विसर्जन अद्याप होऊ शकले नव्हते.
मात्र शनिवार, २ ऑगस्ट रोजी दुपारी ४ वाजता या दोन्ही मूर्तीची विसर्जन मिरवणूक निघणार असून दरवर्षीप्रमाणे कांदिवलीतील डहाणूकर वाडी येथील नैसर्गिक तलावात विसर्जन होणार असल्याची माहिती चारकोपचा राजा मंडळाचे निखिल गुढेकर यांनी दिली. या विसर्जन मिरवणुकीत दहिकाल पथके मानवी मनोरे रचून मानवंदना देणार आहेत. साईलीला दहिकाला पथक, गोराई उत्कर्ष दहिकाला पथक, स्वस्तिक महिला गोविंदा पथक, ॐ साई माऊली क्रीडा मंडळ यांचा त्यात समावेश आहे.
माघी गणेश जयंती उत्सवात पीओपी गणेशमूर्तींची कुठेही विक्री होऊ देऊ नका. ती झाली असल्यास त्या गणेशमूर्तींचे विसर्जन करू देऊ नका, असे आदेश उच्च न्यायालयाने ३० जानेवारी रोजी राज्य प्रदूषण नियंत्रण मंडळ (एमपीसीबी), राज्य सरकार आणि मुंबई महापालिकेसह अन्य महापालिकांना दिले होते. त्यामुळे माघी उत्सवाच्या अनेक गणेशमूर्तीचे विसर्जन रखडले होते. मुंबई महापालिकेने जास्तीत जास्त खोल असे कृत्रिम तलाव तयार केले होते. त्यात अनेक मंडळानी आपल्या गणेश्मूर्तीचे विसर्जन केले. मात्र मूर्तींची उंची जास्त असल्यामुळे कृत्रिम तलावात विसर्जन करण्यास या मंडळांनी नकार दिला होता. कांदिवलीच्या श्री मंडळाने आपली मूर्ती मंडपालगतच्या मैदानात झाकून ठेवली होती, तर चारकोपचा राजा या मंडळाने मूर्ती अज्ञातस्थळी झाकून ठेवली होती. गेल्या काही दिवसांपासून या प्रश्नी तोडगा निघेल या आशेवर या दोन मंडळांचे पदाधिकारी राज्य सरकार व न्यायालयीन सुनावणीकडे डोळे लावून बसले होते.
दरम्यान, २४ जुलै रोजी उच्च न्यायालयाने सहा फुटांपेक्षा अधिक उंचीच्या पीओपी गणेशमूर्तीचे विसर्जन समुद्रात व नैसर्गिक जलप्रवाहांत करण्यास परवानगी दिल्यामुळे या दोन मंडळाच्या गणेशमूर्तीच्या विसर्जनाचा मार्ग मोकळा झाला आहे. त्यामुळे या दोन्ही मंडळाच्या मूर्तींचे आज विसर्जन होणार असल्याची माहिती कांदिवलीचा श्री गणपती मंडळाचे सागर बामणोलीकर यांनी दिली.
