मोडकसागर धरणाला ज्यांचं नाव दिलंय ते नानासाहेब मोडक कोण होते? राज ठाकरे म्हणाले, “त्यांना रोज नमस्कार केला पाहिजे”

राज ठाकरे यांनी उल्लेख केलेल्या नानासाहेब मोडक यांच्याबद्दल इंटरनेटवर पुरेशी माहिती उपलब्ध नाही. मात्र, मुंबई शहराच्या जडणघडणीत त्यांचं मोठं योगदान आहे. क्वीन्स नेकलेस म्हणून ओळखल्या जाणाऱ्या मरीन ड्राईव्हची उभारणी देखील त्यांनीच केली आहे. भारतावर ब्रिटिशांचं राज्य असताना अभियंते नानासाहेब मोडक हे मुंबई महापालिकेत स्पेशल कॉर्पोरेशन इंजिनिअर आणि मुंबई शहराच्या पाणीपुरवठा योजनेचे मुख्य अभियंते होते. त्यांनीच मध्य मुंबईचं टाऊन प्लॅनिंग केलं होतं. या भागात पिण्याचं पाणी पोहोचवण्याचं काम त्यांनीच केलं होतं.

मुंबईच्या विकासात महत्त्वाचं योगदान

नानासाहेब मोडक हे एक जागतिक दर्जाचे वास्तुशास्त्रज्ञ आणि नगररचना तज्ज्ञ होते. दादरमधील सेनापती बापट यांच्या पुतळ्याच्या मागे त्यांचं घर आहे. नानासाहेबांनी मुंबईची वाढती लोकसंख्या लक्षात घेऊन, शहराच्या पाणीपुरवठ्याचा प्रश्न कायमस्वरूपी सोडवण्यासाठी ठाणे जिल्ह्यातील वैतरणा नदीवर धरण बांधण्याची योजना मांडली आणि पूर्ण केली. त्यांच्या कामाचा गौरव म्हणून या धरणाला मोडकसागर असं नाव देण्यात आलं. हे धरण १९५६ मध्ये बांधण्यात आलं आणि १९५७ पासून या धरणातून मुंबई शहराला पाणीपुरवठा करण्यास सुरुवात झाली.

नरीमन पॉइंट ते गिरगाव चौपाटीपर्यंत इंग्रजीमधील सी (C) अक्षराच्या आकारात पसरलेल्या किनाऱ्यावर उभारलेल्या मरीन ड्राईव्हची उभारणी देखील नानासाहेब मोडक यांनीच केली आहे. अमेरिकन टाऊन प्लॅनर अल्बर्ट मेयर यांच्याबरोबर मोडक यांनी ‘अ‍ॅन आउटलाइन ऑफ दी मास्टर प्लॅन फॉर ग्रेटर बॉम्बे (१९४८)’ हा महत्त्वाचा अहवाल तयार केला. पुढे अनेक दशकं शहरातील विकासकामं करताना हा अहवाल वापरण्यात आला.