मुंबई : वाढत्या उष्म्याने मुंबईकरांच्या जीवाची काहिली झालेली असताना रस्त्याच्या कडेला फुललेला सोनमोहोर आणि जमिनीवर पसरेला पिवळ्या फुलांचा सडा डोळ्यांना सुखद गारवा देतो आहे. प्रशस्त रस्ते असोत किंवा आतल्या गल्ल्या… तेथील सोनमोहोराची झाडे बहरली आहेत. त्याच्या नाजूक पिवळ्या फुलांचा सडा सर्वत्र पहायला मिळतो आहे. सोनमोहोराच्या झाडाखालून जाताना होणारा पिवळ्या फुलांचा वर्षावही भर उन्हाळ्यात मन प्रसन्न करतो आहे.
सिमेंट कॉंक्रीटचे जंगल असलेल्या मुंबईत उन्हाळा सुरू झाल्यापासून सोनमोहोराने आपले अस्तित्व दाखवायला सुरूवात केले आहे. एरव्ही रस्त्याच्या कडेला शांतपणे उभे राहून सावली देणाऱ्या या झाडांना वसंत ऋतू आला की चांगला बहर येतो. हिरव्यागार पानांनी डवरलेल्या झाडांमध्ये ही पिवळी धम्मक फुले उठून दिसत आहेत. त्यामुळे एखाद्या परिसराचे सौंदर्यही उठून दिसते. उन्हाळा प्रचंड वाढलेला असताना सोनमोहोरानेही आपली फुलांची उधळण सुरू केली आहे.
या फुलांना मंद सुगंध येतो. त्यांचा वर्षाव असाच जून महिन्यापर्यंत सुरू असतो. बहावा या वृक्षाची फुलेदेखील पिवळी असतात मात्र या वृक्षाचे तुरे जमिनीच्या दिशेने वाढतात. तर सोनमोहोराचे तुरे आकाशाच्या दिशेने वाढत जातात. त्यामुळे संपूर्ण झाडच पिवळ्या फुलांनी आच्छादून जाते. सोनमोहोरोचे झाड डेरेदार वाढते. त्यामुळे पावसाळ्यापूर्वी झाडांची छाटणी केली तरी झाड त्याला चांगला प्रतिसाद देते. छाटणीनंतरही झाडाच्या फांद्या पुन्हा छान वाढतात, असेही अधिकाऱ्यांनी सांगितले. तसेच या झाडांमुळे प्रदूषण कमी होण्यासही मदत होत असल्याची माहिती उद्यान विभागाच्या अधिकाऱ्यांनी दिली.
सोनमोहोराची सुमारे लाखभर झाडे सोनमोहोराचे शास्त्रीय नाव पेलटॉफोरम टेरोकारपम असे आहे. तो फेबॅसी कुलातील वृक्ष आहे. हा वृक्ष विदेशी जातीतील असून इंडो चायना, दक्षिण पूर्व आशिया ते ऑस्ट्रेलिया भागातील हे मूळ वृक्ष आहे. मुंबईत एकूण १ लाख तीन हजार सोनमोहोराची झाडे असल्याची माहिती मुंबई महापालिकेच्या उद्यान विभागाच्या अधिकाऱ्यांनी दिली.
