News Flash

डॉ. भूषणकुमार उपाध्याय नवीन पोलीस आयुक्त

गेल्या महिनाभरापासून आयपीएस अधिकाऱ्यांच्या बदल्या रखडल्या होत्या.

डॉ. भूषणकुमार उपाध्याय नवीन पोलीस आयुक्त
- डॉ. भूषणकुमार उपाध्याय

नागपूर : महाराष्ट्र कारागृह विभागाचे अतिरिक्त पोलीस महासंचालक डॉ. भूषणकुमार उपाध्याय यांची नागपूरच्या पोलीस आयुक्तपदी बदली करण्यात आली आहे, तर नागपूरचे विद्यमान पोलीस आयुक्त डॉ. के. व्यंकटेशम यांची बदली पुणे पोलीस आयुक्तपदी करण्यात आली.

गेल्या महिनाभरापासून आयपीएस अधिकाऱ्यांच्या बदल्या रखडल्या होत्या. हिवाळी अधिवेशनामुळे या बदल्या लांबल्याचे सांगण्यात येत होते. मात्र, जुलैच्या शेवटच्या आठवडय़ात गृह विभागाने राज्यभरातील आयपीएस अधिकाऱ्यांच्या बदल्या केल्या. यापूर्वी नागपुरातून उपायुक्त राकेश ओला यांची बदली नागपूर ग्रामीणचे पोलीस अधीक्षकपदी करण्यात आली, तर ग्रामीणचे अधीक्ष शैलेश बलकवडे यांची बदली गडचिरोलीच्या अधीक्षकपदी झाली आहे. त्यानंतर उपायुक्त कृष्णकांत उपाध्याय, एस. चैतन्य, रवींद्र परदेशी, स्मार्तना पाटील आणि सुहास बावचे यांची बदली झाली. पोलीस सहआयुक्त शिवाजी बोडखे यांची बदली पुणे आणि पुण्याहून रवींद्र कदम हे नागपुरात येत आहेत. त्यानंतर सोमवारी अतिरिक्त पोलीस महासंचालक पदांच्या बदलीची यादी प्रसिद्ध झाली. यात पुणे येथील कारागृह विभागाचे महानिरीक्षक व अतिरिक्त पोलीस महासंचालक डॉ. भूषणकुमार उपाध्याय यांची बदली नागपूर पोलीस आयुकतपदी करण्यात आली, तर नागपूरचे पोलीस आयुक्त डॉ. व्यंकटेशम यांची बदली पुणे पोलीस आयुक्तपदी करण्यात आली.

डॉ. उपाध्याय यांनी यापूर्वी नागपूर ग्रामीणचे पोलीस अधीक्षक, कारागृह विभागाचे उपमहानिरीक्षक आणि नागपूरच्या गुन्हे शाखेचे अतिरिक्त पोलीस आयुक्तपदी काम  केले आहे. त्यामुळे त्यांना शहरातील परिस्थितीचा बराच अभ्यास आहे. बुधवारी ते आपल्या पदाचा कार्यभार स्वीकारणार आहेत.

‘‘सर्वसामान्य लोकांच्या मनात पोलिसांबद्दल असलेली प्रतिमा अधिक सकारात्मक व वृद्धिंगत करण्यासाठी प्रयत्न करण्यात येतील. पदभार स्वीकारल्यानंतर सर्वाशी चर्चा करून स्थानिक गुन्हेगारीचे स्वरूप व इतर बाबी लक्षात घेऊन आवश्यक त्या उपाययोजना करण्यात येतील.’’

– डॉ. भूषणकुमार उपाध्याय, नवे पोलीस आयुक्त.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on July 31, 2018 4:00 am

Web Title: bk upadhyay is new nagpur police commissioner
Next Stories
1 धार्मिक स्थळे तोडण्याला भाजप, काँग्रेसचा विरोध
2 आई विदेशात नोकरीला; आठ वर्षीय मुलाचा ताबा वडिलांकडे
3 विदर्भातील ओबीसी मराठा आंदोलनापासून दूर
Just Now!
X