नागपूर : दररोज मद्य प्राशन करण्याची सवय असलेल्या महापालिकेच्या सफाई कर्मचाऱ्याने एक दिवस दारू न मिळाल्याने घरातील सॅनिटायझर प्राशन केले. यामुळे प्रकृती खराब होऊन त्याचा मृत्यू झाला. ही घटना कोतवाली पोलीस ठाण्यांतर्गत गंगाबाई घाट परिसरात सोमवारी उघडकीस आली. गौतम बिसेन गोस्वामी (४५) रा. गुजरनगर, गंगाबाई घाट असे मृताचे नाव आहे. गौतम हे महापालिकेत रोजंदारीवर सफाई कामगार होते. ते पत्नी व मुलासह राहात होते. त्यांना दारूचे व्यसन होते. पण, टाळेबंदीमध्ये त्यांना दारू मिळत नव्हती. या काळात त्यांनी सॅनिटायझर प्राशन केले. नियमित सॅनिटायझर पिल्याने २१ जून रोजी त्यांची प्रकृती बिघडली. त्यांच्या मुलाने त्यांना मेयोत दाखल केले. आठ त्यांच्यावर उपचार झाले. पण, रविवारी सायंकाळी त्यांचा मृत्यू झाला.
