खळबळजनक! सैन्यातून फरार झालेला मेजर ताब्यात घेतल्यानंतर पुन्हा फरार

पंजाबमध्ये कर्तव्यावर असताना अचानक फरार झालेल्या मेजरला सैन्य अधिकाऱ्यांनी सापळा रचून ताब्यात घेतले होते.

प्रतिनिधिक छायाचित्र/लोकसत्ता

नागपूर : पंजाबमध्ये कर्तव्यावर असताना अचानक फरार झालेल्या मेजरला सैन्य अधिकाऱ्यांनी सापळा रचून ताब्यात घेतले होते. सैन्याच्या ताब्यातून त्या मेजरने दोन दिवसातच पुन्हा पळ काढला.या घटनेमुळे एकच खळबळ उडाली असून या प्रकरणी कामठी पोलिसांनी तक्रारीवरून गुन्हा दाखल केला आहे. मेजर राजीव धालसिंह बोपचे (३५, सिवनी, मध्यप्रदेश) असे संबंधित फरारी अधिकाऱ्याचे नाव आहे.

बोपचेची पंजाब येथील भटिंडा येथे पोस्टिंग होती व फेब्रुवारी २०२० मध्ये सैन्याकडून बोपचेला फरार घोषित करण्यात आले होते. तेव्हापासून त्याचा शोध सुरू होता व त्याच्याविरोधात ‘लूक आऊट नोटीस’ जारी करण्यात आली होती. २९ जुलैला इमिग्रेशन विभागाने बोपचेला विमानतळावरून ताब्यात घेतले व त्यानंतर त्याला सोनेगाव पोलीस ठाण्याच्या पथकाला सोपविले. पोलिसांनी याची सूचना गार्ड्स रेजिमेंटल सेंटरला दिली होती. तेथील अधिकाऱ्यांनी त्याच दिवशी सायंकाळी त्याचा ताबा घेतला व त्याला सेंटरमधील ऑफिसर्स मेसमध्ये ठेवण्यात आले होते. ३० जुलैला त्याला भेटण्यासाठी त्याची आई व भाऊ संदेश हे आले होते.

हेही वाचा >>>प्रेयसीला तिचा पती मारत असल्याचे खटकले म्हणून प्रियकराने…

ते सायंकाळी परतल्यानंतर बोपचे त्याच्या खोलीतच होता व बाहेर सैनिक पहारा होते. रात्री आठ वाजण्याच्या सुमारास तो बाथरूममध्ये गेला व तेथील ग्रिल तोडून त्याने पळ काढला. सैन्याकडून फरार झालेला मेजर ताब्यात घेतल्यानंतर परत फरार झाल्याने खळबळ उडाली. अधिकाऱ्यांच्या सूचनेनुसार जुनी कामठी पोलीस ठाण्यात बोपचेविरोधात गुन्हा नोंदविण्यात आला.

First published on: 04-08-2023 at 12:12 IST

TOPICSनागपूर Nagpur नागपूर न्यूज Nagpur News सैनिक

Nagpur News (नागपूर / विदर्भ न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.

Web Title: A major who absconded from the army absconded again after being captured adk 83 amy