नागपुरात ११२ स्कूलबस, ऑटोरिक्षांवर कारवाई; विद्यार्थ्यांची धोकादायक वाहतूक..

शाळा सुरू झाल्यावरही ७६२ स्कूलबस, स्कूलव्हॅनची योग्यता तपासणी झाली नसल्याचे जिल्हा स्कूलबस सुरक्षितता समितीच्या बैठकीत पुढे आले होते.

Written by लोकसत्ता टीम

नागपूर

July 11, 2023 10:05 IST

प्रतिनिधिक छायाचित्र/लोकसत्ता

नागपूर : शाळा सुरू झाल्यावरही ७६२ स्कूलबस, स्कूलव्हॅनची योग्यता तपासणी झाली नसल्याचे जिल्हा स्कूलबस सुरक्षितता समितीच्या बैठकीत पुढे आले होते. त्यामुळे सोमवारपासून या नियमबाह्य वाहनांवर कारवाई सुरू झाली. पहिल्याच दिवशी ११२ वाहनांवर कारवाई करण्यात आली. प्रादेशिक परिवहन कार्यालय नागपूर शहर, उपप्रादेशिक परिवहन कार्यालयाची दोन पथके तर वाहतूक पोलिसांची काही पथके सोमवारी सकाळपासून कारवाईत गुंतली. आरटीओच्या पथकांनी विविध मार्गांवर विद्यार्थ्यांची वाहतूक करणाऱ्या ३६ स्कूलबस, स्कूलव्हॅन, ऑटोरिक्षा, खासगी वाहने जप्त केली.

वाहतूक पोलिसांनीही ७६ स्कूलबसेस, ३५ ऑटोरिक्षा, २३ स्कूलव्हॅनवर कारवाई केली. नियमबाह्य ऑटोरिक्षांच्या डिक्कीमध्येही मुलांना बसवून नेले जात असल्याचे उघड झाले. त्यामुळे आरटीओनेही २३ ऑटोरिक्षा जप्त केले. काही खासगी वाहनात विद्यार्थ्यांची वाहतूक सुरू होती. या वाहनांपैकी काहींची योग्यता तपासणी नसणे, काहींनी अंतर्गत बदल केलेला असणे, अग्निशमनची पर्याप्त सोय नसणे या बाबी पुढे आल्या. ही कारवाई पुढेही सुरू राहणार असल्याचे आरटीओ आणि वाहतूक पोलिसांकडून स्पष्ट करण्यात आले.

First published on: 11-07-2023 at 10:05 IST